ب سێ پەنەلتیان قەتەر بوو قارەمان
تیما هەلبژارتیێ قەتەر مێڤاندارا قارەمانییا كۆپا ئاسیا یا فوتبۆلێ بۆ جارا دویێ د دیرۆكا خوە دا بوو ناسناڤێ كۆپا ئاسیا 2023ێ ب دەستخوەڤە ئینا پشتی ناسناڤێ كۆپا ئاسیا 2019ێ، د یارییا دووماهیێ دا ب سەركەفتی ل سەر هەلبژارتیێ ئوردن ب سێ گۆلان بەرانبەر گۆلەكێ، د یارییا واندا ئەوا دوهی ل یاریگەها لوسێل ل باژێرێ قەتەر یێ قەتەری هاتیە كرن، گۆلێن قەتەرێ ژلایێ یاریزانێ وێ ئەكرەم حەسەن عفیف هەرسێ گۆل ژ پەنەلتیەكێ هاتریك ئینا د خولەكا 22ێ دا و 72ێ و 90+4 دا تۆماركرن، گۆلا ئوردن ژلایێ یاریزان یەزن ئەلنەعیمات د خولەكا 67ێ دا تۆماركر.
ژلایەكێ دووڤە ئەكەرم حەسەن وەكو گۆلكەرێ قارەمانیێ ژی هاتە خەلاتكرن پشتی شیایی ب هەشت گۆلان سەرێ لیستا گۆلكەران دهێت، ئەیمەن حسێن هێرشبەرێ هەلبژارتیێ ئیراقێ ب شەش گۆلان رێزا دویێ دهێت.
بڤێ دەستكەفتی هەلبژارتیێ قەتەر شیا ناسناڤێ دویێ یێ دیرۆكی ب دەستڤە بینت، ئەوا هەلبژارتیێ چاپان خودان چار ناسناڤان، هەر ئێك ژ سعودیێ، ئیران سێ ناسناڤ هەنە، كوریا باشۆر دو ناسناڤ، هەر ئێك ژ ئیراق، ئوسترالیا، كوێت و ئیسرئیلێ ناسناڤەك یێ هەی.
ل دووڤ رێنمایێن قارەمانیێ خودانا ناسناڤی دێ پێنچ ملیۆن دۆلاران وەرگریت، یا دویێ سێ ملیۆن دۆلار، هەروەسان ئەو هەلبژارتیێن گەهشتینە پێش دووماهیێ هەر هەلبژارتیەك دێ ملیۆنەكێ وەرگریت، سەرجەمێ هەمی هەلبژارتیێن پشكدار بۆ هەر ئیكی 200 هزار دۆلار هاتبوونە تەرخانكرن.
