ب سەدان راپۆرت ل دۆر بنپێکرنێن مافێن مرۆڤی ل تورکیا گەھشتینە دەستێ مە
ئه‌ڤرۆ نيوز:
میشل باچلێ کومیسەرا بلندا مافێن مرۆڤی یا سەر ب نەتەوێن یەکگرتی د چارچۆڤێ کۆنفرانسێ 39 یێ مافێن مرۆڤی دا ل باژێرێ جنێڤ یێ سویسرا راگەھاند کو ب سەدان راپۆرتێن جودا ل سەر بنپێکرنا مافێن مرۆڤی ل تورکیا گەھشتینە دەستێ وان و گۆت: (ھەر چەندە حوکمەتا تورکیا راگەھاند کو وێ رەوشا نەئاسایی راکریە لێ گەلەک ئاشکرایە کو ب کریاری ھێشتا ل تورکیا رەوشا نەئاسایی ھەیە و مافێن خەلکی رۆژانە دھێنە بنپێکرن و ھێزێن ئێمناھیێ یێن تورکیا ب کەیفا خوە خەلکی دگرن و ئەشکەنجە ددەن و ئەو یەک ب چو رەنگەکێ ناھێتە قەبوول کرن و دڤێت تورکیا رێ ل ئازادیان نەگریت و ئەشکەنجەدانێ نەھێلیت).
ناڤھاتیێ راگەھاند ژی مخابن رۆژ ب رۆژ رەوشا مافێن مرۆڤی ل تورکیا خرابتر دبیت و ب ھزاران کەس بێی بەلگە و بێ تاوان دھێنە زیندانی کرن و زۆرداریەکا زێدە ل دژبەرێن حوکمەتێ دھێتە کرن و ئەم دێ د رۆژێن نێزیک دا راپۆرتەکا بەرفرەە ئامادە کەین و رەخنە و پێشنیازێن خوە پێشکێشێ تورکیا کەین.
ل ئالیێ دی رێکخراوا رۆژنامەڤانێن بێ سنۆر ژی راگەھاند کو ب دەھان رۆژنامەڤان، سیاسەتمەدار و چالاکڤانێن مافێن مرۆڤی ل تورکیا د زیندانان دانە و مافێن وان ھاتیە بنپێکرن و دادگەە سەربخوە نینن، رۆژنامەڤان و چالاکڤانێن مافێن مرۆڤی بەردەوام ل ژێر فشارێن ھێزێن ئێمناھیێ دانە و دەستھەلات ناھێلیت کارێن خوە ب ئازادانە بکەن و دڤێت دەستھەلاتدارێن تورکیا رۆژنامەڤانان و چالاکڤانێن مافێن مرۆڤی ئازاد بکەن و رێزێ ل کارێن وان بگرن.
چاڤدێرێن سیاسی ژی دیار دکەن کو پشتی ئەمریکا دەست ب سزادانا تورکیا یا کری ھەلویستێ گەلەک وەلاتێن ئورۆپا و سازیێن مافێن مرۆڤی ژی ل ھەمبەر تورکیا دھێنە گوھۆڕین و ھەکە دەولەتا تورکیا ھەلویستێ خوە ل ھەمبەر وەلاتێن رۆژئاڤا نەگوھۆڕیت رەنگە گەلەک سازیێن دی ژی ھۆشداریێ بدەنە تورکیا یان ژی چالاکیێن خوە ل وی وەلاتی بدەنە راگرتن و وی دەمی تورکیا دێ ب تەمامی ژ ئورۆپا و جیھانێ دوور کەڤیت.
بەری نھا ژی چەندین ھەڤالێن نێزیکی ئەردۆگانی دیار کربوون کو ئەردۆگان بوویە ئەگەرێ قەیرانا نھا یا تورکیا و ھەکە ئەردۆگان ل سەر ھەلویستێ خوە یێ نھا بەردەوام بیت دێ تورکیا تووشی کارەساتێن مەزنتر بیت.
