ب شێواز و رێنمایێن نوو دێ دهست ب چالاكییان هێته كرن
ئهڤرۆ،
د داخویانیهكێ دا ئهندامێ ئێكهتیا تهپا پێی یا كوردستانێ بۆ رۆژناما ئهڤرۆ دیاركر ل وهرزێ بهێت 2022-2023 یێ چالاكیێن تهپا پێی سهر ئاستێ پلا نایاب و ئێك بڕیاره ب شێواز و رێنمایێن نوو دهستپێبكهین كو ببیته پێنگاڤهكا دی ب شێوهیێ پۆزهتیڤ كارتیكرنێ ل سهر پێشخستنا وهرزشا كوردستانێ بهێته كرن و دێ برگه و پرۆگرامێن جودا د ماوهیێ چالاكیان دا ههبن.
زێدهتر ئازاد محهمهد گۆت: بۆ وهرزێ نوو وهكو ئێكهتیا تهپا پێی یا ههرێما كوردستانێ گهنگهشه ل سهر گهلهك تهوهران هاتیه كرن ژبۆ چاوانیا بڕێڤهبرنا خولێن تهپا پێی و پێشخستنا ئاستێ دادڤانا و سهرپهرشتیارێن یاریان و ههروهسان رێنمایێن نوو بهێنه دانان كو رێك نه هێته دان زێدهگاڤی د ماوێ چالاكیان دا ژلایێ ههر یانهك یان كهسهكی ڤه بیت و یاسا دێ سهروهربیت و رژدین ب تۆندی سزایا ههر لایهنهكێ سهرپێچیێ بكهت، لهورا ئهڤه بۆ ماوێ چار حهفتیه بهردهوام كۆمبوون ل گهل نوونهرێن یانێن پشكدار دهێنه كرن و سوبههی ژی دێ ل گهل یانێن پلا ئێك.
ههروهسان ناڤهاتی گۆت: پشتی وهرگرتنا بووچوونا ل سهر ب رێڤهبرنا وهرزێ نوو یێ خولا پلا نایاب بڕیار هاته دان سیستهم ب شێوێ خول دو قۆناغ بهێته ئهنجامدان و ل 17ێ ههیڤا بهێت پشككێشان د رێورهسمهكێ جوان دا بهێته كرن و ههر یانهك دشێت گرێبهستا یاریزانهكی ههتا دو وهرزان ئیمزابكهت و یا گرنگ دڤێت یانه پابهندبیت ب رێنمایێن ئێكهتیا تهپا پێی تایبهت ب دابینكرنا یاریگههێ كو بهرههڤبیت بۆ ئهنجامدانا یاریان ل گهل ههبوونا جهێن ژوورا بۆ تیما ههڤڕك، راگههاندنێ، دادڤان و سهرپهرشتیارێن یاریا و پێدڤیێن دناڤ یاریگههێ و ههبوونا ئهمبۆلانس و پۆلیسێن پاراستنا یاریگههێ و دێ ئهڤه ههبوو ژلایێ لژنهكا تایبهت ل گهل یانێن پشكدار ب سۆزنامه هێنه وهرگرتن پێخهمهت رێڤهبرنهكا سهركهفتی و بێ ئاریشه.
