ب شێوهكێ سهردهما نه زاخۆ چار پیشهكارێن خوه نیشاندان
ئهڤرۆ، عهلی حاجی
ل شهڤا دهربازبووی و بهرههڤبوونا هژمارهكا جهماوهری، یانا زاخۆ یا وهرزشی ل یاریگهها خوه یا نێڤدهولهتی و ب شێوهكێ سهردهمانه ئاهنگا نیشاندنا چار پیشهكارێن تیما خوه یا تهپا پێی ئهوا خوه بهرههڤ دكهت بۆ وهرزێ نوو یێ خولا پلا نایابا ئیراقێ كر و بڕیاره پیشهكارهكێ دی ژی ل سهر تیمێ زێدهكهن.
ئهو پیشهكارێن هاتینه نیشاندان یێ بهرازیلی كاتنێر فرناندۆ بۆ ئێك وهرز،دیسان ههرسێ یاریزانێن وهلاتێ سوریا باهۆز محهمهد، زهید غریر و محهمهد باری، بۆ زانین بهری چهندهكێ گرێبهست ل گهل یاریزانێ رۆمانی نیكۆلا كاتالین ئیمزاكربوو.
لدۆر ڤێ یهكێ بلند شهفیق سهرۆكێ یانا زاخۆ بۆ رۆژناما ئهڤرۆ گۆت: ئهو گرێبهستێن هاتینه ئیمزاكرن لدووڤ داخوازیا راهێنهرێ تیمێ حهمزه هادی بوو ژبۆ دروستكرنا تیما زاخۆ باشترین شێوه و بڕیاره پیشهكارێ شهشێ د رۆژێن بهێت دا گرێبهستا وی بهێته راگههاندن، ههرچهنده بهری ماوهكێ درێژ بوو ئهم گههشتبووینه رێكهفتنێ ل گهل ئهڤان یاریزانان لێ ژبهر ترسا هندێ یانهكا دی پهیوهندیێ پێ بكهن و هێشتا مه ل ئێكهتیا تهپا پێی یا ئیراقێ پهسهند نهكربوو لهورا مه زوو نه راگههاند.
ناڤهاتی دیاركر لدووڤ ئاست و سیڤیێ وان ههموو خودان شیان و گهشبینن دێ مفایی گههینه تیمێ و گۆت: پیشهكارێ شهشێ رهكهز عهرهب ل كێشوهرێ ئهفریقیا د ڕێ دایه و ههردهمێ پێرابوونێن یاسایی ب دووماهی هاتن دێ هێته راگههاندن، دیسان هندهك یاریزانێن وهرزێ بوری ژی دێ دهمهكێ نیزك گرێبهستا وان هێته راگههاندن و دهست ب بهرههڤیێن خوه كهین.
