ب فەرمی یاریگەها نەورۆز دێ فینالا كۆپا ئیراقێ مێڤان كەت
لژنەیا بەریكانەیان ل فدراسیۆنا فوتبۆلا ئیراقێ ڕاگەهاند كو یاریگەها نەورۆز ل پارێزگەها سلێمانیێ دێ مێڤاندارییا یارییا فینالا كۆپا ئیراقێ كەت ئەوا دێ ل دەمژمێر هەشتی شەڤ ل ئەینییا بهێت دناڤبەرا هەردو یانەیێن دهۆك و زاخۆ هێتە كرن.
ل دووڤ نڤێسارا هاتیە بەلاڤكرن یا لژنەیا بەریكانەیا ل فدراسیۆنا فوتبۆلا ئیراقێ هاتییە: پشتی كارگێریێن هەردو یانەیێن دهۆك و زاخۆ ڕازیبوونا خوە ب نڤێسارێن فەرمی دگەل نڤێسارا ڕێڤەبەرییا گشتی یا وەرزشی ل هەرێما كوردستانێ بۆ مە دیار كرییە كو یارییا فینالا كۆپا ئیراقێ ل یاریگەها نەورۆز بهێتە كرن، لەوما ژی ژبەركو هەردو یانەیێن هەرێمێ نە بڕیار هاتە دان ژ یاریگەها شەعب یا نێڤدەولەتی ل بەغدا بۆ یانەیا نەورۆز بهێتە ڤەگۆهاستن وەكو یاریگەهەكا بێ لایەن، هەروەسان ل جهێ رۆژا چارشەمبی بۆ رۆژا ئەینییا بهێت ژڤانێ وێ هاتە دەستنیشانكرن پێخەمەت زێدەتر دەلیڤەدان بۆ یاریزانێن هەردو تیمان كو د بەرهەڤییەكا باشتر دابن.
ژ لایەكێ دووڤە دیار كر كو دێ دەست ب دانانا لژنەیێن جودا بۆ بڕێڤەبرن و ڕێكخستنا كارێن كۆپایێ، هەروەسان دانانا هندەك ڕێنمایان كو مافێ جەماوەرێ هەردو یانەیان یێ پاراستی بیت، دیسان ل پێنج شەمبییا بهێت دێ كۆنگرەیێ هونەری یێ هەردو تیما هێتە دانان.
ل دووماهیێ دیار كر بۆ ڤێ یاریێ دێ لایەنێ ئەمنی و ئاسایشا یاریگەهێ دگەل جهەتێن ئەمنی پێنگاڤێن باش هێنە هاڤێژتن، هەر تشتەكێ گرێدایی بۆ سەركەڤتنا یاریێ دێ هێتە كرن، ب هیڤی نە جوانترین شێوە و ڕێكخستنەكا سەرفەراز بڕێڤە بچیت كو ژبەركو سەركەڤتنە بۆ وەرزشا كوردستانێ و ئیراقێ.
