ب كوژمێ زێدەتری سێ ملیار دیناران پرۆژە ل مسێریكێ هاتینە جێبەجێكرن
دلۆڤان ئاكرەیی
سەرۆكێ باژێرڤانییا مسێریكێ بۆ رۆژنامەیا ئەڤرۆ دیار كر، پێنچ پرۆژە د بیاڤێن چێكرنا جادە و كۆلان و سولیناندا ل سنۆرێ ناحیێ هاتینە چێكرن، زێدەتری ٩ كیلومەتران جادە هاتینە قێركرن و كونكریتكرن و دو باخچە ل سەر روبەرەكێ بەرفرە هاتینە چێكرن و ژمارەیەكا دوكانان ل سەر كێمدەرامەتاندا هاتینە دابەشكرن.
ئەندازیار باوەر سەگڤان سەرۆكێ باژێرڤانییا مسێریكێ یا سەر ب قەزا سێمێل ڤە گۆت: د نوكەدا ژمارەیەكا پرۆژەیان د قوناغێن ئەنجامدانانێنە و ل سێ سالێن بوری ٥ پرۆژە ب كۆژمێ زێدەتری ٣ ملیار دیناران د بیاڤێن جادە و سولیناندا بۆ چارەسەركرنا كێشەیێن خەلكێ ناحیێ ب درێژاهییا ٩ كیلومەتران قێر و كۆنكریت كرینە و جودا ژێ وێ ب درێژاهییا ١٥٠٠ مەتران سولینێن گەرەكێن ناحیێ دروستكرینە.
گۆت ژی: ژ بەر كێمییا كەسكاتییێ ل ناڤا سەنتەرێ ناحیێ دو باخچە ل سەر جادا گشتی یا ناحیێ دروستكرینە كۆ باخچەیەك ل سەر رۆبەرێ ٢ هزار مەترێن دوجایە و جهێ رونشتنێ هەیە و كار بۆ خزمەتگوزارییێن دی ژی دهێتە كرن كۆ دناڤا وی باخچەیدا هەبن و باخچەیەكێ دی ژ لایێ رێكخراوەكێ ڤە كو تێدا ڕێژەیەكا كەسكاتییێ و روونشتنێ هەیە هاتیە چێكرن.
خویاژی كر، ٢٥ دوكانێن بچووك ب سەر كێمدەرامەتاندا دابەشكرینە و جادەیا سەرەكی یا كۆ ل قەزا سێمێل بۆ سەنتەرێ ناحیێ دهێت دوسایدە، بەلێ نەهاتیە تەمامكرن و گۆت: وان پلانەك ب كۆژمێ ٢ ملیار و ٥٠٠ ملیون دیناران بۆ سنۆرێ ناحیا مسێریكێ ئامادەكریە، د پلانا خۆ دا بریاردایە كۆ جادەیەكا ڤەگۆهاستنێ ل كەمەرا ناحیێ دروست بكەن و هەمی تاخ و كولانان ب وێ جادێڤە گرێدەن بۆ مەبەستا هاتن وچوونێ نەخاسمە ترومبێلێن بارهەلگر.
ئەو یەك ژی دیار كر، ب تەمامبوونا هەردو پرۆژەیێن چێكرنا جادە و كولانێن ناحیێ و ب دەستپێكرن و تەمامبوونا پرۆژێ چێكرنا ٢٥ جادەیێن ناڤا سەنتەرێ ناحیێ و پرۆژەیێن تاخێ سەرهەلدان كۆ كۆژمێ ٨٠٠ ملیون دینار بۆ هاتینە تەرخانكرن و دگەل تەمامبوونا پلانا هاتیە دانان دێ قەزا سێمێل و ناحیا مسێریكێ پێشكەڤتن و روویەكێ جوان ب خۆڤە بینن.
