ب لێدانێن پەنەلتیان دهۆك و زاخۆ خالێن یاریێن خوە ژ دەستدان
پشتی ب دووماهی هاتنا یاریێن گەڕا 29ێ ژ هەڤڕكیێن خولا ستێرێن ئیراقێ یا فوتبۆلێ سەرباری ئەنجامێن جێواز چ گوهۆڕین ل سەر رێزبەندییا هەر چار یانەیێن كوردستانی دهۆك، زاخۆ، هەولێر و نەورۆز نە هاتینە كرن و جهێ خوە پاراستن، ژلایەكێ دیڤە شەڕێ سەرێ لیستێ دناڤبەرا شورتە و جەوییە بەردەوامە.
ئەحمەد خەلەف: خوسارەتییا مە ژ خەلەتیێن كەسوكی بوون
تیما یانەیا دهۆك دەلیڤەیا وەكهەڤیێ ژ دەستدا پشتی دگەل یانەیا نەجەف ب گۆلەكا پەنەلتیێ تووشی خوسارەتیێ بووی، د یارییا واندا ئەوا ل شەمبییا بۆری ل یاریگەها نەجەف هاتیە كرن، سەرباری خوسارەتیێ تیما دهۆكێ مانا خوە د رێزبەندیا چارێ دا پاراست ب 44 خالان ژ 11 سەركەفتن و 11 وەكهەڤیان و حەفت خوسارەتی هەنە.
راهێنەرێ دهۆكێ ئەحمەد خەلەف ئەگەڕێ خوسارەتییا تیما خوە ب بڕیارێن كەسۆكی ددانیت ئەوێ د پرێسكۆنفرانسەكێ رۆژنامەڤانی دا پشتی یاریێ گۆت: حەزا مە بوو ئەم بێ خال ژ نەجەف نە ڤەگەڕین لێ كاودانانا وەكر ب گەهینە ڤێ خوسارەتیێ، د نیڤا ئێكێ دا گەلەك دباش بووین لێ گوهۆڕینا پاشڤەچوونا ئاستی ب بڕیارێن كەسوكی یێن هندەك یاریزانان بەروڤاژی ئەوا مە دڤیایی هاتە كرن، یارییەكا ب هێز بوو و مە ئاستەكێ جوان و هەڤڕك نیشاندا، لێ هەرچەوا بیت دڤێت ڤێ یاریێ ژبیر بكەین و هزر د یارییا بهێت دا بكەین پێخەمەت باشترنا ئەنجام و رێزبەندییا خوە.
راهێنەرێ زاخۆ:د فوتبۆلێ دا ئەنجامێ یاریێ ب دەستخوەڤە بینە و یاریێ نەكە
ژلایێ خوەڤە تیما یانەیا زاخۆ ژی جهێ خوە ل رێزا چارێ پاراست پشتی دگەل خودانێن ئەردی یانەیا زەورا ب گۆلەكێ وەكهەڤبووین، هەرچەندە تیما كوڕێن خابوری یا پێشكەفتی بوو ب گۆلا ستێرێ خوە یێ نێڤدەولەتی ئەمجەد عەتوان ب لێدانا پەنەلتیێ د خولەكا 20ێ دا لێ دەرئەنجامێ گڤاشتنێن بەردەوام یانەیا زەورا ژی شیا پەنەلتیەكێ وەربگریت د خولەكا 58ێ دا لوئەی ئەلعانی گۆلا وەكهەڤیێ بۆ خودانێن ئەردی بینت، بڤی ئەنجامێ زاخۆ تیما زاخۆ ب49 خالان رێزا چارێ پاراست ژ 12 سەركەفتن، 13 وەكهەڤییان و بتنێ سێ خوسارەتی هەنە.
د پرێسكۆنفرانسێ رۆژنامەڤانی دا پشتی یاریێ تەلال ئەلبلوشی راهێنەرێ زاخۆ گۆت: یارییەكا ب زەحمەت بوو بەرانبەر یانەكا جەماوەری و مە هەردو یانەیان شەڕێ رێزبەندییا سێیێ دكر، سەرباری تیما زەورا ژ مە باشتر بوو و ئەو خودانا ئەردی بوو، لێ د فوتبۆلێ دا ئەنجامێ یاریێ ب دەستخوە ڤە بینت و یاریێ نەكەت، د بەرانبەر دا گۆلپارێزێ زاخۆ عەلی كازم ئەوێ بوویە باشترین یاریزانێ یاریێ گۆت: یارییەكا ب هێز بوو و ئەنجام ژی یا دادپەروەر بوو، بۆ یاریێن بهێت دڤێت ئەنجامێن خوە باشتر لێبكەین.
هەولێر و نەورۆزێ ژی جهێن خوە پاراستی نە
ژلایێ خوەڤە هەردو یانەیێن دی یێن كوردستانی د خولا ستێرێن ئیراقێ دا جهێن خوە پاراستی نە د رێزبەندییا خولێ خولی دا سەرباری ئەنجامێن تۆماركری، یانەیا هەولێر ل یاریگەها دهۆكێ بێ گۆل دگەل یانەیا حدود یا بەغدایی وەكهەڤبوو، ئەڤ ئەنجامە یا باش نەبوو بۆ كوڕێن كەلهە و منارە ژبەركو یا د رێزبەندیەكا خراب و مەترسی دا بۆ داكەفتنێ ئەوا 28 خال كۆمكرین ل رێزا 15ێ دهێت، ژلایێ خوەڤە د یارییەكا دراماتیكی دا و پڕی گۆل یانەیا نەورۆز شیا ب 4-3 گۆلان سەركەفتنێ ل سەر مێڤانا خوە یانەیا نەفت ئەلوەست بینت ئەوا رێزا دووماهیێ دهێت، تیما كوردستانی ب كۆمكرنا 44 خالان رێزا حەفتێ دهێت.
رێزبەندیا گۆلكەرێن خولێ
هەتا نوكە هێرشبەرێ یانەیا جەوییە ئەیمەن حسێن ب 23 گۆلان سەرێ لیستەیا گۆلكەران دهێت، دووڤدا پیشەكارێ نەفت ئەلمیسان عەلائەدین ئەلدانی ب17 گۆلان رێزا دویێ، پیشەكارێ شورتە یێ سوری مەحمود ئەلمواس ب 14 گۆلان رێزا سێیێ دهێت، گۆلكەرێن ئێكێ یێن ل سەر ئاستێ یانەیێن كوردستانی یێ یانەیا نەورۆز و پیشەكارێ نیجیری ئیبراهیم تۆمیوا 12 گۆل تۆماركرینە، یێ یانەیا هەولێر محەمەد قاسم هەشت گۆل تۆماركرینە، ستێرێ بەرازیلی و یانەیا زاخۆ فرانك سیدریك حەفت گۆل هەنە، یێ تونسی و یانەیا دهۆك عیماد ئەللواتی شەش گۆل هەنە.
ئەنجامێن یاریێن دی و رێزبەندییا گشتی
ژ ئەنجامێن یاریێن دی بڤی شێوەیی بوون، كارەبا 1-2 ئەلقاسم، كەرخ چنە-چنە نەفت، ئەمانەت بەغدا 1-1 نەفت ئەلبەسرا، كارەبا 1-2 شورتە، نەفت میسان چنە-1 تەلەبە، مینا چنە- چنە جەوییە، هەلوەستێ گشتی پشتی ب دووماهی هاتنا یاریێن گەڕا 29ێ بڤی شێوەیە:
1- شورتە 64 خال.
2- جەویە 63 خال.
3- زەورا 56 خال.
4- زاخۆ 49 خال.
5- نەجەف 49 خال.
6- دهۆك 44 خال.
7- نەورۆز 44 خال.
8- حدود 39 خال.
9- نەفت 39 خال.
10- نەفت میسان 37 خال.
11- تەلەبە 37 خال.
12- ئەلمینا 33 خال.
13- كارەبا 32 خال.
14- كەربەلا 29 خال.
15- هەولێر 28 خال.
16- كەرخ 27 خال.
17- نەفت ئەلبەسرا 26 خال.
18- ئەلقاسم 22 خال.
19- ئەمانەت بەغدا 19 خال.
20- نەفت ئەلوەسەت 12 خال.