ب مەرجەكی رێ ب ڤەگەڕیانا دهۆكێ بۆ نایابا ئیراقێ دێ هێتە دان
بۆ وەرزێ چارێ ل دووڤ ئێك تیما باسكێت بۆلا یانەیا دهۆكێ خودانا پێنچ ناسناڤان پشكداریا وێ د خولا پلا نایابا ئیراقێ دیار نینە و هەكە ڤەگەڕییت بۆ وەرزێ 2023- 2024ێ دڤێت مەرجێن ئێكەتیا باسكێت بۆلا ئیراقێ بجه بینت.
د داخویانیەكێ دا سكرتێرێ ئێكەتیا باسكێت بۆلێ یا ئیراقێ دیار كر بۆ وەرزێ بهێت یێ خولا پلا نایاب 13 یانە هاتینە پەسەندكرن ژبۆ پشكداری د خولێ دا ئەو ژی، زاخۆ، نەفت، حەشد ئەلشەعبی، شورتە، دیفاع ئەلجەوی، دیجلە ئەلجامعە، غازا باكۆر، كارەبا، حللە، كەرخ، نەفتا باكۆر، دیوانیە و تیجارە، سەرباری ب شێوەكێ گۆتن مە گوه لێبوویە تیما یانەیا دهۆك دێ پشكدار بیت لێ هەتا نوكە چو نڤێسارێن فەرمی بۆ مە نەهاتینە و هەكە بهێت ژی مە مەرجێن تایبەت هەنە بۆ ئەوان یانەیێن خودان ناسناڤ و بەرنیاس وەكو دەرفەتەك و رێزگرتنەك ژبۆ ڤەگەڕیانا وێ بۆ پلا نایاب ژ وانا دڤێت كۆمەكا باش یا یاریزانێن هەلبژارتیێ ئیراقێ و پیشەكار هەبن دا بشێت پشكداربن، هەكە شیانێن ئینانا یاریزانێن بڤی ئاستی نەبن و حەز بكەت پشكداریێ بكەن دێ ل ڤاڤارتنێن خولا پلا دو و ئێك هەتا بگەهیتە پلا نایاب.
ژلایەكێ دووڤە ناڤهاتی گۆت: بۆ پلا ئێك یا وەرزێ بهێت 15یانە هاتینە پەسەنكرن ژپۆ پشكداریێ ئەو ژی ئەكاد، دەربەندیخان، عومال نەینەوا، ناسریە، تەزامن، نەفت میسان، نوعمانیە، ئەلیەقزە، سامرا، ئیمام ئەلموتقین، فورات، قەلعەت سوكەر، ئەلوەحدە، شەترە و حەبانیە.
بۆ زانین دووماهی پشكداریا باسكێت بۆلا یانەیا دهۆك ل وەرزێ 2019-2020ێ بوو، د قۆناغا ئێكێ یا خولێ دا دهۆك رێزا چارێ هاتبوو و دەربازبوو قۆناغا دویێ، دگەل یانەیا نەفت بەسرا یاریەكێ وەكهەڤبوو و ئێكێ خوسارەت بوو، لێ ئەڤ وەرزە ژبەر بەلاڤبوونا ڤایرۆسێ كۆرۆنایێ د یاریێن دویێ یا قۆناغا پێش دووماهیێ هاتنە هەلوەشاندن.
