ب نفشەكێ نوو خوەلێكدانا زاخۆ دێ شەڕی بۆ ناسناڤی كەت
ب پێكهاتیەكێ جودا و نفشەكێ نوو بڕیارە ئەڤرۆ تیمێن یانەیا زاخۆ یا خوەلێگدانێ بۆ ئاستێن جودا پشكداری قارەمانییا ئیراقێ، ئەوا دێ هەڤڕكیێن وێ بۆ ماوەیێ دەهـ رۆژان پایتەختێ ئیراقێ بەغدا ب پشكدارییا باشترین یانەیان بۆ كێشێن جودا بهێتە كرن و زاخۆ نوونەرا ئیدارا سەربەخوە و پارێزگەها دهۆكێ یە.
رەمەزان حەسەن سەرۆك شاندێ یانەیا زاخۆ بۆ رۆژنامەیا ئەڤرۆ گۆت: پشكدارییا تیمێن مە بۆ قارەمانییا ئەڤ سالە ل سەر ئاستێ خوەلێكدانا ئازاد و رۆمانی دێ ب نفشەكێ نوو و هیڤیێن مەزن بیت، ل سەر ئاستێ پشكۆژان پێنچ یاریزان پشكداربن، ل سەر ئاستێ لاوان 11 یاریزانن، ل سەر ئاستێ تازەپێگەهشتیان ژی پێنچ یاریزان و ئاستێ بەهرەمەندان 10 یاریزانن كو هەمی یاریزان ئەون وەكو پێنگاڤ و تاقیكرنا ئێكێ یا قارەمانییا ئیراقێ پشكداربن بۆ یاریێن خوەلێگدانا ئازاد و یا رۆمانی.
هەروەسان ناڤهاتی گۆت: ئەڤ قارەمانییە جودا یە ژ قارەمانیێن دی ژبەركو ب نفشێ نوو و هیڤیێن مەزن و وەرگرتنا مفایی و شارەزاهیی دێ پشكداربن و دیسان شەڕی هەتا دووماهی یاری بۆ رێزێن پێشیێ كەین و ئەڤ نفشە دێ بنە بنیاتەكێ بهێز بۆ وەرزشا زاخۆ، سۆپاسییا كارگێرییا یانەیا زاخۆ دكەین بەردەوام پشتەڤانییا مە دكەن و بۆ ڤێ قارەمانیێ ژی.
