ب نەمانا چەکی دێ پڕانیا پرسێن هەی چارەسەر کەین
پەیڤدارێ ئاکپارتیێ دیار دکەت ئەو چاڤەرێنە د دەمەکێ نێزیک دا پەکەکە هەموو چەکێن خوە رادەست بکەت، دەمێ چەک نەمان دێ ل تورکیا گوهۆڕینێن گەلەک مەزن روو دەن، وەکو ئاکپارتی وان دڤێت ب رێیا دستوورەکێ نوو هەموو پرسێن هەی چارەسەر بکەن.
عومەر چەلیک پەیڤدارێ ئاکپارتیێ دیار کر، حوکمەتا تورکیا ژ نێزیکڤە دووڤچوونا قووناغا رادەستکرنا چەکان دکەت، دڤێت پەکەکە هەموو چەکێن خوە رادەست بکەت، وی دەمی دێ گوهۆڕینێن گەلەک مەزن ل تورکیا روو دەن، ل جهەکێ چەک هەبیت و شەڕ بەردەوام بیت کەس نەشێت بەحسێ چاکسازیێ و دیموکراسیێ بکەت، ژ بەر ڤێ یەکێ ژی ب سالانە ئەم دبێژین چەکێ د دەستێ پەکەکێ دا بووینە ئاستەنگ ل هەمبەر پێشڤەچوونا دیموکراسیێ و چارەسەرکرنا پرسێن نها ل تورکیا و گۆت: (بریارا هەلوەشاندنا پەکەکێ گەلەک گرنگ و دیرۆکی بوو، لێ ئەو یەک تێر ناکەت و دڤێت ب کریاری پەکەکە چەکێن خوە رادەست بکەت، وی دەمی دێ ل تورکیا ژی قووناغەکا نوو دەستپێکەت، وەکو تورکیا مە دڤێت ب رێیا دستوورەکێ نوو هەموو پرسێن هەی چارەسەر بکەین، بێگومان پرسا کوردی ژی د چارچۆڤەیێ دستوورەکێ نوو دا دێ هێتە چارەسەر کرن، ژ بۆ ڤێ یەکێ ژی گرنگە بەری هەر تشتەکێ پەکەکێ چەکێن خوە رادەست بکەت).
پەیڤدارێ ئاکپارتیێ ئەو یەک ژی دیار کر، سەرۆک کۆمارێ تورکیا گەلەک گەشبینە دێ قووناغا نها گەهیتە ئەنجامەکێ باش، بێگومان گەلەک ئاستەنگی ژی هەنە، لێ ئەم هیڤیدارین سۆزێن کو بەری نها هاتینە دان بهێنە بجهئینان، قووناغا نها ژ بۆ دیموکراسیا تورکیا ژ بۆ ئاشتیێ و براتیێ گەلەک گرنگە، کارێن گەلەک باش ژی هەتا نها هاتینە کرن، لێ هێشتا ژی گەلەک تشت هەنە کو دڤێت بهێنە کرن، یا هەری گرنگ ژی رادەستکرنا چەکانە و گۆت: (تورکیا وەلاتەک بهێزە و دشێت هەموو پرسێن خوە چارەسەر بکەت، لێ تیرۆر بوویە بەلا سەرێ تورکیا، نها کارێن گەلەک باش هاتینە کرن و ئەم هیڤیدارین ئێدی د رۆژەڤا تورکیا دا چەک و شەڕ نەمینیت، وی دەمی دێ قووناغەکا گرنگ و دیرۆکی دەستپێکەت کو ئەو یەک د بەرژەوەندیا هەموو وەلاتێن تورکیا دایە).
عومەر چەلیک د دووماهیا ئاخڤتنا خوە دا ئەو یەک ژی دیار کر، ل تورکیا کەسێ شەڕ و ئالۆزی نەڤێت، ئارامی و پێکڤەژیان د بەرژەوەندیا هەموو وەلاتیێن تورکیا دایە، ب دانوستاندنان هەموو پرسێن هەی دێ هێنە چارەسەر کرن، ژ بۆ ڤێ یەکێ ژی گرنگە هەموو لقێن پەکەکێ یێن ل دەرڤەی تورکیا ژی بهێنە هلوەشاندن، چونکی مە دڤێت چو مەترسی ل سەر تورکیا نەمینیت، وی دەمی ب دیموکراسیێ و دستوورەکێ نوو دێ تورکیا گەلەک پێش کەڤیت، لێ گەلەک هێز هەنە دخوازن ئاستەنگان ل هەمبەر پێشڤەچوونا تورکیا دروست بکەن.
