ب هاریكارییا فوئاد حسێنی ئه‌م شیاین ڤیزه‌یا كوێتێ بۆ جه‌ماوه‌رێ دهۆكێ به‌رده‌ست بكه‌ین
زنار تۆڤی:
د داخویانیه‌كێ دا چیایی ته‌یمور عەبدال، ئەندامێ ئه‌نجوومه‌نێ په‌رله‌مانێ ئیراقێ ژ فراکسیۆنا پارتی دیموکراتی کوردستان، بۆ رۆژناما ئەڤرۆ دیارکر ئه‌و شیان ڕازیبوونا لایه‌نێ وه‌لاتێ كوێتێ وه‌ربگرن ژبۆ دابینكرنا ڤیزه‌یا چوونێ بۆ دو هزار ژ جه‌ماوه‌رێن یانه‌یا دهۆك بۆ ناڤ ئاخا وێ پێخه‌مه‌ت پشته‌ڤانییا تیما خوه بكه‌ن به‌رانبه‌ر یانه‌یا ئه‌لقادسییه ژ چارچووڤه‌یێ یارییا چوونێ و ئێكێ یا دووماهییا كۆپا كه‌نداڤی ئه‌وا بڕیاره سوبه‌هی ده‌مژمێر 7:45 شه‌ڤ ل وه‌لاتێ كوێتێ بهێته كرن.
زێده‌تر ناڤهاتی گۆت: پشتی داخوازی و داکوکیا من ل سەر وەرگرتنا ڤیزێ بۆ پاسپۆرتێن نۆرمال و لێخۆشبوون ژ پارێن وەرگرتنا ڤیزێ بۆ پشتەڤانێن یانه‌یا دهۆکێ بۆ وەلاتێ کوێتێ، هەروەسا ب پشته‌ڤانییا به‌رێز د. فوئاد حسێنی، وەزیرێ دەرڤەیێ ئیراقێ كو داخواز ژ وەزیرێ ناڤخۆیێ ئیراقێ کربوو، نڤیسارەکێ بۆ وەزیرێ ناڤخۆیێ کوێتێ بکەت بۆ وەرگرتنا ڤیزا بێ بەرامبەر، ل گەل هندێ د. مەنهەل ئەلسەفافی بالیوزێ کوێتێ ب تەلەفۆنێ ئەز ئاگەهدار کرم، کو وی پەیوەندیەکا تەلەفۆنی ل گەل وەزیرێ ناڤخۆیێ کوێتێ کرییە، وەزیرێ ناڤخۆیێ کوێتێ رازی بوو دو هزار ڤیزه‌یان بێ بەرامبەر بۆ هەر جورە پاسپۆرتەکا هەبیت بدەتە پشتەڤانێن دهۆکێ، کو دێ ب رێیا فۆرمان بۆ دناڤبه‌را یانه و كۆمپانێن گه‌شتیاری هێنه به‌لاڤكرن
ناڤهاتی گۆت ژی: ئەز دگەل بەنگین رێکانی، سەرۆکێ دەسهەلاتا فرینا ئیراقێ ئاخفتی بووینه، کو نێزیكی سێ گەشته‌یێن فرۆکان راستەوخۆ ژ فرۆکخانا هەولێرێ تەرخان بۆ فرۆکخانا کوێتێ هه‌بن و ڕازیبوون وه‌رگرتبوویه، ئه‌ڤچه‌نده ژی هه‌موو وه‌كو ئاسانكاری و پشته‌ڤانی بۆ جه‌ماوه‌رێ مه ل دهۆكێ و كوردستانێ.
