ب هیڤیێن ڤه‌گه‌ڕاندنا ناسناڤی سه‌نحاریب دێ پشكداری قاره‌مانیا ئیراقێ بیت
ئه‌ڤرۆ،
دهێته چاڤه‌ڕێكرن تیما كچێن یانا سه‌نحاریب پشكداری قاره‌مانیا ئیراقێ یا باسكت بۆلێ بیت ئه‌وا دێ هه‌ڤڕكیێن وێ ب پشكداریا 14 یانێن كوردستانێ و ئیراقێ ل دووماهیا ڤێ هه‌یڤێ هه‌ولێرا پایته‌خت مێڤانداریا وێ كه‌ت.
داوود ره‌به‌ن سه‌رۆكێ یانا سه‌نحاریب بۆ رۆژناما ئه‌ڤرۆ گوت: یانا سه‌نحاریب وه‌كو ئێك ژ تیمێن هه‌ڤڕك بۆ ناسناڤی به‌رهه‌ڤیا بۆ قاره‌مانیێ دكه‌ت ئه‌وا دێ ل 29ێ ڤێ هه‌یڤێ هه‌تا چارێ چڕیا ئێكێ یا بهێت ل هۆلا ئه‌كاد هه‌ولێرا پایته‌خت هێته كرن، ئارمانج و هیڤیێن مه د مه‌زنن كو ناسناڤێ خوه یێ به‌ری چار سالان ڤه‌گه‌ڕێنین لێ ئاسته‌نگ ژی گه‌له‌كن ئه‌ڤچا یا د شیان دا بیت دێ باشترین شێوه به‌رهه‌ڤیان كه‌ین وه‌كو ئێك ژ یانێن نوونه‌را پارێزگه‌هێ و هه‌ڤڕك ل سه‌ر ئاستێ ئیراقێ، هه‌رچه‌نده ئێكه‌تیا باسكت بۆلا ئیراقێ ژ نشكه‌كێ ڤه بڕیاره‌ك دایه كو دڤێت هه‌ر یانه‌كێ یاریزانه‌كا پیشه‌كار بینته د ناڤ رێزێن تیما خوه دا ئه‌ڤچه‌نده بوویه جهێ دلگرانیێ ژبه‌ركو مه شیانێن دارایی بۆ یاریزانێن ده‌رڤه نینن و هه‌روه‌سا د ده‌مه‌كێ نه گۆنجایی ژی دا هاتیه به‌حسكرن، له‌ورا ب نڤێساره‌كا فه‌رمی مه داخواز ژ ئێكه‌تیا ئیراقێ كریه ده‌می ب ده‌نه مه یان ژی مه ئه‌و شیان نینن پشكداریێ بكه‌ین.
ژلایه‌كێ دیڤه ناڤهاتی دیاركر كو پێكهایتێ سه‌نحاریب ژ كچێن باژێرێ دهۆكێ یه و پرانیا وان د ژیێ بچووك و كێم شاره‌زاهی هه‌یه و گوت: ئینانا یاریزانێن كچ بۆ ناڤ تیمێ دا و به‌رهه‌ڤكرنا وان ب باشترین شێوه ب زه‌حمه‌ته ژبه‌ركو پرانیا وان به‌رده‌وامیێ نا ده‌نه راهێنانا ژ ئه‌گه‌رێن جودا له‌ورا ئه‌ڤه ژی ئێك ژ ئاسته‌نگا یه، هه‌ر چه‌وابیت دڤێت ناڤ و سه‌نگا تیما خوه د ناڤ قاره‌مانیێ دا پارێزین سه‌رباری تیمێن دی باشترین شێوه و ب هه‌بوونا پشته‌ڤانیا دارایی و رژدین پشكداریه‌كا سه‌رفه‌رازبیت.
