ب هەلكەفتا 18 شواتێ مالا لاوان دێ كۆڕبەندەكی گێڕیت
ئەڤرۆ، هەرهین محەمەد:
قوتابی سەرێ رومێ نە د هەموو شۆڕەش و ڕاپەرینان دا و ل ژێر درووشمێ (لاو و ماددەیێن هۆشبەر) ب هەلكەفتا 18 شواتێ سالرۆژا دامەزراندنا ئێكەتیا قوتابیێن كوردستانێ، مالا لاوان ل رێكەفتی 15/2/2024 ل دەمژمێر چاری ئێڤاری ل ئوتێلا ژیان دێ كۆڕبەندێ خوە یێ سێیێ ل دۆر چارەسەریێن ئەڤێ مەترسێ ب چار رەهەندان ڤە ئەنجامدەت، دیسا پانێلەك ژی بۆ هەر ئێك ژ پ. ه. د. رێنجبەر جەمیل شێخۆ رەهەندێ یاسایی. پ. ه. ئسماعیل بامەرنی رەهەندێ جڤاكی. د. رێبەر فەتاح رەهەندێ ئابووری و پ. د. نەزاكەت حسێن رەهەندێ میدیایی دێ هێتە گێڕان.
كاوار نێروەیی، بەرپرسێ مالا لاوان ل دهۆكێ بۆ ئەڤرۆ گۆت: «مە راپرسیەك ل سەر 173 گەنجێن توشبوویی كریە و دێ ئەنجامێن وێ راگەهینین، دیسا د كۆڕبەندی دا مە پانێلەك هەیە و چار دكتۆر و مامۆستایێن زانكۆیێ دێ دانوستاندنێ كەن و ئەگەر و چارەسەریان دیاركەن، كا چ پێنگاڤ بهێنە هاڤێتن ژ بۆ كێمكرنا ئەڤێ ئاریشێ، ژ بەركو ماددەیێن هۆشبەر ئێك ژ بابەتێن مەترسینە ل سەر ئاستێ دونیایێ، ب تایبەتی ل وەلاتێن دەوروبەر، وەلاتێ ئیرانێ هەڤسنوورە ل گەل مە و ئێكە ژ چێكەرێن ماددەیێن هۆشبەر و گەلەك جاران بۆ تێكدانا ئاسایشا سیاسی و جڤاكی یا وەلاتێ مە ب كاردئینیت و گەنجێ مە ژی تووشی ئەڤان بابەتێن مەترسیدار دكەت».
ناڤهاتی گۆتژی: «ئەم وەكو مالا لاوان ب ئەركێ خوە دزانین، سالانە ئێك ژ بابەتێن گرنگ بكەینە بابەتێ كۆڕبەندی خوە، ئەڤ سالە ژی وەكو بابەتەكێ ب مەترسی و گەف ل سەر ئاسایشا گشتی د ناڤ هەرێما كوردستانێ دا و ب تایبەتی تەخا لاوان».
