ب هەماهەنگی دێ ڕێکخستنا ئەکادیمیێن فوتبۆلێ هێتە کرن
د داخویانیەکا تایبەت دا ڕێڤەبەرێ وەرزشی ل پارێزگەها دهۆکێ دا دیار کر کۆمبوونەک دناڤبەرا وان و فدراسیۆنا فوتبۆلا پارێزگەها دهۆکێ هاتە کرن و بڕیار هاتیە دا ب دانانا لژنەیەکا هەڤپشک ل دووڤ ڕێنماییان ژبۆ ڕێکخستنا ئەکادیمی و فێرگەهێن یارییا فوتبۆلێ ل سنۆرێ پارێزگەها دهۆکێ.
زێدەتر جەمال سلێمان بۆ ڕۆژنامەیا ئەڤرۆ گۆت: پێخەمەت ڕێکخستن و ڕێکۆپێکییا کارێ ئەکادیمی و فێرگەهێن یارییا فوتبۆلێ ل پارێزگەها دهۆکێ شاندەکێ شاندەکێ فدراسیۆنا فوتبۆلا پارێزگەها دهۆکێ سەرەدانا مە کر کو پێکهاتی بوون ژ ئەحمەد حسێن جێگرێ سەرۆکێ فدراسیۆنێ و عەبدولرەحیم حاجی و ئازاد مەقسود ئەندامێن فدراسیۆنێ و مە ب تەسەلی چەندین بابەت بەحسکرن ئەوێن گرێدایی ب وەرزشا فوتبۆلا پارێزگەهێ، تەوەرێ گرنگ یێ ئەم ل سەر راوەستیاین و گەنگەشە ل سەر کری ئەکادیمی و فێرگەهێن فوتبۆلێ ل پارێزگەهێ بوون کو یا فەرە دووڤچوونەکا باش بۆ بهێتە کرنن دگەل شاندێ فدراسیۆنیێ ب تیۆری بابەت هاتە بەحسکرن و دانۆستاندن ل سەر چەند خالان هاتە کرن.
هەروەسان ناڤهاتی گۆت: بۆ مە گرنگە ل دووڤ ڕێنمایێن ڕێڤەبەرییا گشتی یا وەرزشی ل هەرێما کوردستانێ ئەم کار بکەین ژبۆ ڕێکخستنا کارێ ئەکادیمییان کو دێ ل دووڤ پیڤەر و مەرجێن تایبەت بن ژ هەبوونا یاریگەهان هەتا دگەهیتە خالێن سلامەتییا یاریزانێ ئەکادیمیێ، بۆ ڤێ یەکێ بڕیار هاتیە دان لژنەیەکا هەڤپشک ژ ڕێڤەبەریێ و فدراسیۆنا فوتبۆلا دهۆکێ بهێتە پێکئینان، ل دووڤ ڕێنمایێن هژمارە ئێک یا سالا ٢٠٢٥ێ ژ ڕێڤەبەرییا گشتی یا وەرشی ل هەرێما کوردستانێ یا تایبەت ب ئەکادیمی و فێرگەهێن فوتبۆلێ ڤە، کارێ سەرەکی سەرپەرشیکرنا کارۆبارێن هەموو ئەکادیمی و فێرگەهێن فوتبۆلێ ل سنۆرێ پارێزگەها دهۆکێ بکەن ل دووڤ ڕێنمایان ڕێکخستن بۆ بهێتە کرن پێخەمەت دانا مۆلەتا کاری، ئەڤەژی دێ د بەرژەوەندییا گشتی دا بیت و بیتە ئەگەڕ ژبۆ پێشئێخستنا وەرزشا فوتبۆلێ ل پارێزگەهێ.
بۆ زانین ل وەرزێ ئەڤ سالە ئەکادیمی و فێرگەهێن وەرزشی ل پارێزگەها دهۆکێ ب شێوەیەکێ بەربەلاڤ هاتینە ڤەکر و گازندە ل سەر کێم خزمەتگۆزاری و زێدە وەرگرتنا پشکداران و یاریزانان و نەبوونا چارەسەرێ بزیشکی یێ ئەکادیمییان.
