ب وێنه: هه‌وه‌كا به‌فره‌هـ بۆ ژناڤبرنا سيسكا ل ميحوه‌رێ تلسقۆف يێ پێشمه‌رگه‌ى ده‌سپێكر
ئه‌ڤرۆ نيوز، له‌زگين جۆقى:
رێڤەبەرێ خوەپاراستنا ساخلەمیێ ل دھۆکێ بۆ ئەڤرۆ دیار کر کو پشتی ل چەند میحوەرێن پێشمەرگەی جۆرەکآ سیسرکان ب رەنگەکێ زۆر بەربەلاڤبووینە و ھێزێن پێشمەرگەی بێزارکرینە، پشتی ئەو ھاتینە ئاگەھدارکرن، ھەموو بەرھەڤیێن خوە بۆ ژناڤبرنا وان و پاراستنا پێشمەرگەی کرینە و گۆت: “ئەڤرۆ ھەوەکا بەرفرەە یا رەشاندنێ د ژی وان سیسرک و ھەموو مێش و مورێن دی ل وان دەڤەرێن لێ پەیدا بووین دێ دەسپێکر”.
د. بەختیار ئەحمەد، رێڤەبەرێ خوەپاراستنا ساخلەمیێ ل دھۆکێ ئاشکرا کر، ل دەڤەرا خەتارێ و دەوروبەرێن سکرێ مووسل، جۆرەکێ سیسرکان ب رەنگەکێ بەرفرەە ل بەرۆکێن شەری یێن پێشمەرگەی بەلاڤبووینە و گۆت: “پشتی ئەم ھاتینە ئاگەھدارکرن، دەملدەست مە ب تیمەک ھنارتە وێرێ بۆ زانینا رەوشێ و رەشاندنا وان، دیسا ل رۆژێن چارشەمبی و پێشەمبیا بۆری ژی ئەم ھاتینە ئاگەھدار کرن کو ھەمان جۆرێ سیسرکا ل ھندەک جھێن تلسقۆف بەربەلاڤبووینە و تیمەکێ مە یێ رێڤەبەریا خوەپاراستنا ساخلەمیێ چوونە ویرێ و رۆژا پێنجشەمبی ھەوەکا رەشاندنێ ل وێرێ دەستپێکر”.
گۆتژی: “ئەڤرۆ ٨-١١-٢٠١٥ سێ چار تیمەک چوونە وێرێ و ھەوەکا بەرفرەە یا رەشاندنێ بۆ ژناڤبرنا وان سیسرکان ئەنجامدا”.
خویا ژی کر، ژ ئەگەرێ وێ بارانا ل دەشتا نەینەوا باری و لێدا خەندەکان و گەلەک جە ل وان دەڤەران د بەرداینە و بارینا بارانێ ژی بۆ نە ئەگەر ئەو سیسرکە ب وی رەنگێ بەرفرەە ل وان دەڤەران پەیدا ببن.
د. بەختیار دا زانین کو وان نموونە ژ وان سیسرکا وەرگرتینە و ژ لایێ زانستی ڤە دێ پشکنینان ل سەر کەن دا کو بزانین چ مەترسی ھەنە و گۆت: “ژ لایێ زانستی ڤە د گەل لایەنێن پەیوەندیدار, وەکو: رێڤەبەریا گشتی یا چاندنێ و کۆلیژا چاندنێ ئەم یێ دووڤچوونا بابەتی دکەین، دا کو جۆرێ وان سیسرکا بھێتە زانین و چارەکا بنبر بۆ بھێتە دیتن، لێ جارێ دا کو کارتێکرنەکا نەباش نەکەنە سەر رەوشا پێشمەرگەی و ئیزعاجا وان نەکەن دێ وان دەڤەران رەشینین”.
رێڤەبەرێ خوەپاراستنا ساخلەمیێ ل دھۆکێ ئاماژە ب وێ چەندێ ژی کر، ھەتا نوکە چ کارتێکرنێن نەرێنی یێن راستەوخوە نەکرینە سەر ساخلەمیا پێشمەرگەی، دووڤچوون یا بەردەوامە و ژ بۆ ھندێ ھەر نیشانەکا نەچاڤەرێکری ل دەف پێشمەرگان یان کەسێن دی بھێتە دیتن، زوو بھێنە چارەکرن.
