ب وێنه: هێشتا پێشه‌نگه
ئەڤرۆ نيوز:
ھەرچەندە ژیێ وێ ژ پێنجی سالیێ دەرباز بوویە، لێ ھەتا نوکە دەمێ دچیتە جھێن گشتی ژ چاڤکێن کامیرا خلاس نابیت، و بەردەوام وێنێن وێ ل بەڕگێ ئێکێ یێن رۆژنامە و کۆڤاران بەلاڤ دبن.
ھۆلیا ئەڤشار، ھونەرمەندا ناڤدارا تورکی، کو ژبەرچاڤێن وێ یێن شین ب (ماڤی) دھێتە نیاسین، دبێژیت: ھەر کەسەکێ ناڤدار ببیت خۆشی و نەخۆشیێن خوە یێن ھەین، لەورا ئەز ژی وەکو ئەکتەرەک ھندەک جاران ھەست ب خۆشیێ و ھندەک جاران ژی ھەست ب نەخۆشیێ دکەم، بۆ نموونە دەمێ دچمە جھەکی و دبینم خەلکەک یێ رێزێ ل من دگریت گەلەک کەیفا من دھێت، و ئەڤ چەندە بۆ من یا خۆشە، لێ دەمێ ھندەک جاران دچمە جھەکێ گشتی وەکو باغچە و سوپەرمارکێتان ئەز ژبەر کامیرێن رۆژنامەڤان دڕەڤم، چونکو خۆشیێن من تێک ددەن.
ناڤھاتی ل سالا 1963 ل وەلاتێ تورکیا ژ دایک بوویە، و ل سالا 1982 بوویە شاھجوانا وی وەلاتی، و دماوێ بۆری دا ل گەل ھونەرمەندێ ناڤدار ئیبراھیم تاتلیسی دا پشکداری د چەندین فلماندا کریە، کو ئێک ژوان ب ناڤێ (ماڤی ماڤی) بوویە، کو ل سالا 1984 ھاتبوو نیشادان، و ل دووڤ گۆتنا شارەزایێن ھونەری ل وی وەلاتی ھەتا نوکە (ماڤی) پێشەنگە، چونکو ل سەر ئاستێ وی وەلاتی و ھەتا ئورۆپا ژی ب رەنگەکێ بەرفرەە جھێ خوە دناڤ دلێ جەماوەری دا کریە.
