ب وێنه: وه‌رزێ چوونا كۆمكرنا ده‌ستپێكر
ئەڤرۆ نیوز، نەوزاد ھلۆری:
ژ ئەگەرێ بەفر و بارانان، ئەڤ سالە کەنگرێن ھشک ل سنوورێ ناحیا دینارتە باشن، ئەڤرۆ بەشەک ژ وەلاتیێن گوندێن دینارتێ کریە بانگ و کومکرنا کەنگرا دەست پێ کریە، وەلاتیەک ددەت دیارکرن کو بەشەک ژ وەلاتیان ب فروتنا کەنگرا داھاتەکێ دەستخوڤە دئینن.
رزگار ئەحمەد، وەلاتیەکێ گوندێ پرێسە یا سەر ب ناحیا دینارتێ یە بو ئەڤرۆ نیوز گۆت: (ئەڤرۆ وەلاتیێن گوندێ پرێسە دەست ب بانگا کەنگرا ھشک کریە، سوپاس بو خودێ ژ ئەگەرێ بەفر و بارانان ئەڤ سالە کەنگر باشن).
زێدەتر گۆت: (بانگا کەنگرا ل دەڤ مە پتری پێنج روژان بەردەوامە، دڤی ماوەی دا وەلاتی ھەیە روژانە دناڤبەرا 30 بو 35 کیلویێن کەنگرا کوم دکەت کو ئەڤ یەک ژی باشە و بەشەک ژ خەلکی دشێن داھاتەکێ بخوە پەیدا بکەن).
ناڤبری دیارکر ژی کو ئەڤ سالە ھەمبەری سالا بوری کەنگر گەلەک باشترە و زێدەتر گۆت: (پارسال کیلویا کەنگرا 10 ھزار دیناران دھاتە فروتن، ئەم دخوازین ئەڤ سالە باشتر بیت، داکو رەنج و ماندووبوونا وەلاتیان ژی بەر ئاڤ دا نەچیت، چونکی کەنگر زور ماندووبوون و ل دەڤەرێن چیایی دروست دبن).
گوندێ پرێسە نێزیکێ 60 مال تێدا دژین، ژیانا پرانیا خەلکی لسەر خودانکرنا تەرش و کەوالی و چاندنێ و رەز و بیستان و کەرستێن چیایە.
