ب وێنه: گەنجەکێ ئێزدی دێ مۆزەخانەکێ ب کەرەستێن کارەساتا شنگال درۆست کەت
ئەڤرۆ ئەمیر ئەترووشی:
گەنجەکێ ئێزدی راگەھاند، ئەڤە ماوێ دوو سالانە وی دەست ب کۆمکرنا ھەموو کەرەستەیێن کارەساتا شنگالێ کری و ب تایبەت ئەو بەلگەیێن ل ژێر دەستھەلاتا داعش کارەسات ب سەرێ کوردان ھاتی.
بەھزاد فەرمان، ئەو گەنجێ ئێزدیە بۆ ئەڤرۆ دیار کر، ئەو رۆژانە ل ناڤ خەلکێ ئێزدی و ئاوارە دگەریت بۆ کۆمکرنا ھەموو بەلگە و کەرەستێن گرێدای کارەساتا شنگال ئەوا ب سەرێ کوردێن ئێزدی ھاتی، چونکو رەنگە دەمەک بھێت و ھندەک کەس بێژن چ ب سەرێ کوردێن ئێزدی نەھاتیە، بەلێ ئەگەر ئەڤ کەرەستە و بەلگە بھێنە کۆمکرن، کارەساتا شنگال ب چو رەنگان ناھێتە ڤەشارتن.
بەھزاد ئاشکرا ژی کر، نھا وی دەست ب دانانا مۆزەخانەکێ کریە ب تنێ گرێدای بەلگە و کەرەستێن کارەساتا شنگالێ نە و گۆتیشی: من گەلەک کەرەستە و بەلگە ب وان ژن و زارۆیان ژی کۆمکرینە ئەوێن ژ بن دەستێ داعش رزگاربووین و ل نێزیک دێ مۆزەخانا خۆ ب ناڤێ (مۆزەخانا شنگال) راگەھینم.
ئەو یەک ژی ئاشکرا کر، ھەتا نوکە وی 2500 کەل و پەلێن کارەسا شنگال دیکۆمێنتکریە، چونکو د 73 فەرمانێن ب سەر ئێزدیان ھاتین چو فەرمان نەھاتینە دیکۆمێنتکرن و ئەڤە ئێکەم جارە دێ فەرمانەکا ئێزدی ب بەلگە و کەرەستە ھێتە دیکۆمێنتکرن و گۆتیشی: ھەر بەلگە و کەرەستەکێ مە دیکۆمێنتکری، چیرۆکەکا خەمگین ب دووڤ را ھەیە و ھەر کەل و پەلەکێ ھاتیە دیکۆمێنتکرن ژمارەک بۆ ھاتیە دانان و ھاتینە پۆلینکرن و ل گۆرەی ژمارا پۆلینا وێ چیرۆکا وێ د پەرتۆکەکێ دا ھاتیە نڤێسین.
بەھزادی خویاژی کر کو ھەتا نوکە وی ناڤێن ھەموو قوربانیێن کارەساتا شنگال ژی ب دیوارێ مۆزەخانا خۆڤە تۆمارکرینە.
