ب پلانێن دەربازبوونێ فوتبۆلا بەردەڕەش دەست ب بەرهەڤییان كر
رەمەزان زەكەریا:
د داخویانیەكێ دا سەرۆكێ یانەیا بەردەڕەش یا وەرزشی ئاشكراكر بۆ وەرزێ نوو یێ خولا پلە دویا كوردستانێ، تیما وان یا فوتبۆلێ ب بەرنامە و پلانێن دەربازبوونێ بۆ پلا ئێك دەست ب راهێنانا كریە ب هیڤینە ل وەرزێ نوو ب شێن دلێ جەماوەرێ خوە خوەشبكەن، ئەڤە ئارمانجا یا هەموو یانەیێ یە و دخوازین ب پێشەنگی بچنە ناڤ خولێ دا.
زێدەتر سەمیر عەبدولقادر بۆ رۆژنامەیا ئەڤرۆ گۆت: ژلایێ كارگێری و پلان بەرهەڤیێن باش هاتینە كرن و ب فەرمی سەلوان محەمەد دازد بۆ وەرزێ ئەڤ سالە دێ بیتە ڕاهێنەرێ تیما مە یا فوتبۆلێ كو خەلكێ مووسلێ یە، ئەوێ د دەمەكێ دا ڕاهێنەرێ یانەیا مووسل بوو و دیسان هاریكارێ راهێنەرێ هەمان یانە بووە دگەل چەند یانەیێن دی كار كریە وەكۆ هارێكارێ راهێنەری، مە باوەریەكا مەزن پێ هەیە كو ئەڤسالە دگەل تیما یانەیێ ئەنجامێن باش دەستڤەبینیت و یانەیا بەردەڕەش بگەهینیت خولا پلە ئێك ژبەركو خودان سەربۆرە و شارەزاهی هەیە.
ناڤبری گۆتژی: پێنەڤێت بۆ ب هێزكرنا رێزێن تیمێ دەمێ ل دووڤ پلان و بەرنامەیێ هاتیە دانان د دەمەكێ نێزیك دا دێ چەند یاریزانێن پێشەكار گرێبەستێ دگەل كەین بۆ ناڤ رێزێن یانەیێ هەروەسان دێ مە یاریزانێن خوون گەرم یێن خەلكێ بەردەرەش و دەوروبەران هەنە، ژلایێ دارایی ڤە رەوشا یانەیێ هەتا رادەیەكێ زۆر یا باشە، ئارمانجا مە ئەوە ئەڤسالە سەركەڤین بۆ خولا پلە ئێك و دلێ جەماوەرێ خوە خوەشبكەین و تیما خوە ڤەگەڕینە جهێ وێ و دووڤ دا بۆ پلا نایابا كوردستانێ.
