ب چاڤدێریا مەسرور بارزانی ئاهەنگا نەورۆزێ ل ئاكرێ دێ هێتە گێڕان
صەباح زوهێر زێباری:
دەڤەردارێ ئاكرێ د كۆنگرەكێ رۆژنامەڤانی دا پلانا ئاهەنگا نەورۆزێ ل ئاكرێ راگەهاند و دبێژیت: ل ژێر چاڤدێریا مەسرور بارزانی، سەرۆكێ حوكمەتا هەرێما كوردستانێ ل رۆژا 20/3/2024 ئاهەنگا نەورۆزێ ل ئاكرێ ب ئامادەبوونا چەندین قونسلخانێن بیانی و مێهڤانێن ناڤخووەیی و ئیراقی دێ هێتە گێڕان.
د. دلاوەر بوزۆ، دەڤەردارێ ئاكرێ د كۆنگرەكێ رۆژنامەڤانی دا گۆت: «مە وەكو لیژنا بلند یا سەرپەرشتیا ئاهەنگێ ئامادەكاریێن خوە كرینە ل رۆژا 20/3/2024 و ل دەمژمێر (1:00)ێ پشتی نیڤرۆ ل دەورا كانی مامكرۆكێ ئەو رێك هەتا سەرێ گری دێ هێتە گرتن، ب تنێ بۆ حالەتێن پێدڤی دێ رێك هەبیت، ل دەستپێكێ ل دەمژمێر 6:50 پشتی بانگێ مەغرەب و رۆژئاڤابوونێ دێ رێورەسمێن ئاهەنگێ دەستپێكەن و دێ ب هەلكرنا مەشخەلێن ئاگری ل (كەلها ئاكرێ، كەلەكەڤنێ، رەزێ میری، خرگا و گرێ تۆپا) دێ دەست ب هەلكرنا ئاگری كەن و خەتیرێن ئاگری بۆ ڤان جهان بەن».
دەڤەردارێ ئاكرێ گۆتژی: «ل دەمژمێر 7:40 یاریێن ئاگری ل كەلها كەڤن و كەلها ئاكرێ دێ هێنە هاڤێتن و ل گەل سروودێن ئایینی و نەتەوەیی، داكو كارتێكرن ل مەها رەمەزانا پیرۆز نەهێتەكرن، گروپێن مە یێن خوەبەخش، كو كارەكێ مەزن ئەنجامدایە، ئەو دێ ب هەلكرنا مەشخەلێن ئاگری رابن و دەستخوشیێ ل وان گروپان هەمیان دكەین، كو چەندین سالە ب ڤی كاری رادبن».
گۆتژی: «د ناڤ باژێرێ ئاكرێ دا پۆلیس دێ هێنە بەلاڤكرن و هەر كەسێ تەقێ بكەت ب شێوەكێ توند دێ رووبروویێ یاسایێ بیت، ئەم داخوازێ ژ هەمی وەلاتیێن دەڤەرێ دكەین، كو هاریكار بن، ئەم بشێن دیمەنەكێ شارستانی و جوانێ باژێرێ خوە دیار بكەین، هەروەسا تیمێن بەرگریا شارستانی و تیمێن پۆلیسێن دارستانێ دێ ل جهێن جودا جودا هێنەدانان بۆ هەر روودانەكێ و سەرپێچیەكێ، بنگەهێن ساخلەمیێ ژی دێ د خزمەتا وەلاتیان دا بن».
