ب چاڤدێریا پارێزگارێ دهۆكێ رێیا قهرهناز بۆ كهڤرهسۆر ب درێژیا 44كم هاته ڤهكرن
ئهڤرۆ:
د. عهلی تهتهر، پارێزگارێ دهۆكێ سهرهدانا دهڤهرداریێن بهردهڕهش و ئاكرێ كر و پڕۆژهیێ رێیا (قهرهناز، دارهتوو، بشیریان و كهڤرهسۆر) ل دهڤهرداریا بهردهڕهش و پشكا دهرئێخستنا دهستووریێن ئهلكترۆنی یێن هاژۆتنا ترۆمبێلان ل دهڤهرداریا ئاكرێ ڤهكرن.
گرنگیدان ب گههاندنا پڕۆژێن خزمهتگوزاری بۆ وهلاتیێن پارێزگههێ دوهی 20/12/2022 ب چاڤدێریا د. عهلی تهتهر، پارێزگارێ دهۆكێ و ب ئامادهبوونا ئیسماعیل مستهفا، دهڤهردارێ بهردهڕهش و چهند بهرپرسێن حزبی و ئیداری پڕۆژهیێ رێیا (قهرهناز، دارهتوو، بشیریان و كهڤرهسۆر) هاته ڤهكرن.
ل بهراهیێ دهڤهردارێ بهردهڕهش د پهیڤهكێ دا ئاماژه دا رۆلێ كابینا نههێ یا حكومهتا ههرێما كوردستانێ، كو چهندین پڕۆژێن خزمهتگوزاری یێن گرنگ ل سنوورێ دهڤهرداریا بهردهڕهش بجهئیناینه و سوپاسیا سهرۆكێ حكومهتێ مهسروربارزانی، ههروهسا پارێزگارێ دهۆكێ كر و ئهو گرنگیا دایه دهڤهرداریا بهردهڕهش و تهكهز كر كو خهلكێ گهلهك گوندان دێ مفای ژ ڤێ رێكێ بینن.
پارێزگارێ دهۆكێ د پهیڤهكێ دا پیرۆزباهیا خهلكێ دهڤهرێ كر و دیار كر، ل دووڤ راسپاردێن سهرۆكێ حكومهتا ههرێمێ مهسرور بارزانی ٦٦ پڕۆژێن گرنگ ل دهڤهرداریا بهردهڕهش ب گوژمێ پتر ژ 65 ملیار دیناران دهێنه ئهنجامدان و گۆت: “رێكا هاتیه ڤهكرن ئێك ژ پڕۆژێن گرنگه و خهلكێ گهلهك گوندان دێ مفای ژێ وهرگریت، دیسا د سالا بهێت ژی دا كۆمهكا دی یا پڕۆژان د ههموو بیاڤان دا دێ هێنه ئهنجامدان”.
ئهندازیار ئاراز جهمال پهیڤا كۆمپانیا بجهئینهرا پڕۆژهی (كاڤین گروپ) پێشكێشكر و دیار كر كو پڕۆژه بهری ژڤانێ خوی ب نهه مههان كهته د خزمهتا خهلكێ دهڤهرێ دا.
پڕۆژهیێ رێیا (قهرهناز، دارهتوو، بشیریان و كهڤرهسۆر) ب درێژاهیا ٤٤ كم یه و ب كوالیتیهكا باش و ب فرههیا نهه متران هاتیه قێركرن و گوژمێ نێزیكی ٢٠ ملیار دیناران ل سهر بودجا حكومهتا ههرێمێ بۆ هاتبوونه تهرخانكرن و پتر ژ ١٥ كۆمهلگههـ و گوندان دێ مفای ژێ بینن.
دیسا ههر دوهی ب مهرهما پیرۆزباهیكرنا بهرپرسێ نوو یێ لقێ نهه یێ پارتی ل ئاكرێ د. عهلی تهتهر، پارێزگارێ دهۆكێ سهرا بارهگایێ لقێ نهه یێ پارتی دیموكراتی كوردستان ل ئاكرێ دا و ژ لایێ مهردان خدر، بهرپرسێ نوو یێ لقێ و كارگێر و ئهندامێن لقێ پێشوازی لێ هاته كرن.
دیسا ههر دوهی و ب مهرهما ب ساناهیكرنا مامهلێن خهلكێ دهڤهرداریێن ئاكرێ و بهردهڕهش نهخاسمه بۆ كاروبارێن هاتنوچوونێ د. عهلی تهتهر، پارێزگارێ دهۆكێ ب ئامادهبوونا شهعبان خهلیل، دهڤهردارێ ئاكرێ ب وهكالهت و دهڤهردارێ بهردهڕهش و چهند بهرپرسێن حزبی و ئیداری پشكا دهرئێخستنا دهستووریێن ئهلكترۆنی یێن هاژۆتنا ترۆمبێلان ل رێڤهبهریا هاتنوچوونێ ل دهڤهرداریا ئاكرێ ڤهكر.
