ب چاڤدێریا پارێزگـارێ دهۆكـێ خانیێ كچێن بـێ سەمیان هاتە ڤەكرن
ل ژێر چاڤدێریا د. عەلی تەتەر، پارێزگارێ دهۆكێ و ب ئامادەبوونا ئسماعیل محەمەد ئەحمەد، دەڤەردارێ دهۆكێ و رێڤەبەرێ گشتی یێ چاڤدێریا جڤاكی ل پارێزگەهێ و چەندین رێڤەبەرێن فەرمانگەهێن میری و كەسایەتیێن دەڤەرێ ل رۆژا 28/11/2024 خانیێ مەندۆ یێ چاڤدێریا كچێن بێ سەمیان ل سەنتەرێ دهۆكێ هاتە ڤەكرن و گەڕیانەك د ناڤ پشكێن ئاڤاهی دا هاتە كرن و ژ نێزیك سەحكرە بەرهەڤیا وی بۆ پێشوازیكرنا كچێن بێ سەمیان.
پارێزگارێ دهۆكێ د پەیڤەكێ دا دەستخوشی ل خێرخواز شڤان عزەت و كۆمپانیا مەندۆ و هەموو لایەنان كر یێن بووینە هاریكار ئەڤ خانیێ نموونەیی بۆ كچێن بێ سەمیان ئاڤاكری، دیسا خواست خودان شیان و سەرمایەدار بەریكانێ ل سەر ئاڤاكرنا ڤان جۆرە پڕۆژەیێن مرۆڤایەتی وخێرخوازی بكەن.
هەژی گۆتنێ یە ئاڤاهیێ ناڤبری ژ لایێ كۆمپانیا مەندۆ یا خێرخوازی ب گوژمێ ملیۆنەك و 900 هزار دۆلاران هاتیە ئاڤاكرن ژ چار نهۆمان و چەندین ژوور و هۆل و جهێن تایبەت پێك دهێت، ل دەستپێكێ 18 كچێن بێ سەمیان د ناڤ دا دێ هێنە ب خودانكرن، د شیان دایە هەتا 60 كچێن بێ سەمیان لێ بهێنە وەرگرتن.
