ب چاڤدێری و پشتەڤانیا پارێزگارێ دهۆكێ 14 پرتووكێن نوو هاتنە ئیمزاكرن
ب هەلكەفتا دامەزراندنا كۆمارا كوردستانێ ل مەهاباد دوهی 22/1/2024 ل هولا محەمەد عارف جزیری و ب چاڤدێری و پشتەڤانیا د. عەلی تەتەر، پارێزگارێ دهۆكێ و ب ئامادەبوونا عەلی عەونی، بەرپرسێ لقێ ئێك و ئەندامێن نڤیسینگەها رێكخستنا پارتی ل پارێزگەهێ و چەند رەوشەنبیر و نڤیسەر و رۆژنامەڤان و كەسایەتیێن پارێزگەها دهۆكێ رێورەسمێن ئیمزاكرن و بەلاڤكرنا 14 پرتووكێن نوو، كو ب پشتەڤانیا پارێزگارێ دهۆكێ هاتینە چاپكرن هاتنە گێڕان.
رێڤەبەرا راگەهاندن و چاپ و بەلاڤكرنێ ل پارێزگەها دهۆكێ د پەیڤەكێ دا سوپاسیا پارێزگارێ دهۆكێ و هەموو كارمەندان كر و دیار كر كو ژبلی ڤان 14 پرتووكان ل سالا نوو ژی بەردەوام پرتووكێن نوو دێ هێنە چاپكرن.
پاشی پارێزگارێ دهۆكێ پەیڤەك پێشكێشكر و دامەزراندنا كۆمارا كوردستان ل مهاباد ل هەموو كوردان پیرۆزكر و ئاماژە دا دەستكەفتێن كۆمارا كوردستانێ و گوت: “ل سەر راسپاردێن سەرۆكێ حوكمەتا هەرێما كوردستانێ ئەم گرنگیێ ب چاپكرنا هەموو بابەت و پرتووكێن زمانێ كوردی و بابەتێن مێژوویی و كلتۆری و نەتەوەیی و نیشتمانی یێن كوردستانی ددەین، هەتا نوكە مە پشتەڤانی ل چاپكرنا پتر ژ 40 پرتووكان كریە، داخوازێ ژ نڤیسەران دكەم، كو گرنگیێ ب بابەتێن ناڤبری بدەن، ئەم بەرهەڤیا پارێزگەهێ بۆ چاپكرنا وان بەرهەمان دیار دكەین و پیرۆزباهیا هەموو نڤیسەرێن وان 14 پرتووكان دكەین و داخوازا سەركەفتنێ بۆ دكەین”.
پاشی پرتووك ژ لایێ نڤیسەران ڤە هاتنە ئیمزاكرن و بەلاڤكرن.
