ب ڕێژەیا 90% یارییا بهێت دێ چارەنڤیسێ ئاكرێ دیار بیت
رەمەزان زەكەریا
د داخۆیانیەكێ دا پەیڤدارێ یانەیا ئاكرێ یا وەرزشی ئاشكراكر تیما وان یا فوتبۆلێ د ڕەوشەكا هەرە باش دایە و هەموو ئامادەكاری بۆ یارییێن داهاتی هاتینە كرن تایبەت یاریا بەرامبەر شێروانە ئەوا دێ بڕیارە ل حەفتییا بهێت ژ چارچووڤەیێ ڤاڤارتنێن خولا پلا سێ دەربازبوون بۆ پلا دو ئیراقێ هێتە كرن.
زێدەتر سوهەیب عەلی بۆ رۆژناما ئەڤرۆ گۆت: خۆشبەختانە ئاستێ یاریزانێن تیما مە بەر بلند بوونێ دچیت و یاری بۆ یاریێ یێ بەر ب پێشڤە دچیت و گەشەپێدانەكا بەرچاڤ د ناڤ تیمێ دا پەیدا بوویە، هەتا نوكە چو ئاستەنگێن مەزن ل هەمبەر كاروانێ یانێ نینە و هەموو تشت ب رێكوپێكی بڕێڤە دچن.
ناڤبری گۆتژی: یاریا بهێت دێ دگەل یانەیا شێروانە بیت كو دێ یاری بۆ مە وەكۆ قووناغا فیناڵەكێ یە، ژبەر كو ئەگەر ب سەركەفتن ژ ڤێ یاریێ دەركەڤین دێ شێین بێژین 90% پرسا سەركەفتنا ئاكرێ بۆ خولا پلە دو یا ئیراقێ ئێكلا بیت، پێنەڤێت ئەركێ مە ب سانەهی نابیت لێ شەڕی بۆ سێ خالان كەین.
سوهەیبی ئەوچەندە ژی گۆت: هەموو بزاڤێن كارگێڕی و كادرێن تەكنیكی و یاریزانان بۆ هندێ نە كو دلێ جەماوەرێ ئاكرێ خۆش بكەن و یانەیێ بگەهیننە ئاستەكێ بلندتر، كو ئەو ژی سەركەفتنە بۆ خولا پلە دو یا ئیراقێ وەكو لدووڤ پێنگاڤێن مە دانانین هەتا بگەهینە ئارمانجا مەزن ئەو ژی خولا ستێرێن ئیراقێ یە.
