ب ڤیدیۆ – شێلادزێ بازاره‌كێ ب خێر و بێرێ فرۆتنا گوندورێ شێخان و باتیفایه
ئه‌ڤرۆ نیوز ، نه‌وزاد هلۆرى:
هه‌ر چه‌ند ل سنوورێ ناحیا شێلادزێ ئه‌ڤ ساله چوو به‌رهه‌مێ گوندى نه‌هاتیه چاندن، به‌لێ شێلادزێ بازاره‌كێ ب خێر و بێر یێ فروتنا به‌رهه‌مێ گوندورێ شێخان و بایتفایه، و رۆژانه ده‌هان پیكئابێن گوندوران دهێنه فروتن.
قه‌درى تێلى ، وه‌لاتیه‌كێ شێلادزێ یه و رۆژانه گوندوران ل باتیفا و شێخان دئینیته شێلادزێ و دفروشیت ، بۆ ئه‌ڤرۆ نیوز گۆت: (ئه‌م رۆژانه گوندوران ل سنوورێ زاخو و شێخان ب تایبه‌تى باتیفا و هنده‌ك جاران ژى ل مێرگێ دئینینه بازارێن شێلادزێ و دفروشین، به‌رى نوكه عه‌لاگه ب هزار دیناران دهاته فروتن ، به‌لێ ژبه‌ركو نوكه گوندور به‌ر ب كێمبوونێ ڤه دچیت بهایێ وان بلند بویه چونكى به‌رى نوكه مه پیكئاب 150 هزار دیناران دكرى و نوكه ب 300 هزار دیناران دكرین و تنێ 700 كیلو تێدانه).
زێده‌تر گۆت: (بازارێ شێلادزێ ئێكه باشترین بازارێن سنوورێ پارێزگه‌ها دهۆك بو كرین و فورتنا هه‌موو جورێن ده‌رامه‌ت و فیقى و ل ڤى وه‌رزێ سالێ كرین و فروتنا به‌رهه‌مێن خومالى گه‌رم دبیت ، و دبیته باشترین بازار بو ساخكرنا به‌رهه‌مێن چاندنێ ب تایبه‌تى گوندور و شتى و هه‌موو جورێن فێقى).
ئه‌كره‌م حه‌جى عه‌بدوللا ئه‌و ژى وه‌لاتیه‌كێ دن یێ شێلادزێ یه و كرین و فروتنا گوندورى دكه‌ت بۆ ئه‌ڤرۆ نیوز گۆت: (ئه‌و گوندورێن كو ل زاخو بو شێلادزێ دهێنه ئینان حه‌فت یان هه‌شت كیلو ب هزار دیناران دهێنه فروتن ، چونكى به‌ر ب دوماهیێ ڤه دچین، و هه‌ر چه‌نده قه‌یرانا دارایى كارتێكرن لسه‌ر فروتنا گوندوران و به‌رهه‌مێن دن كریه به‌لێ خه‌لك هه‌ر دكرن و بازار گه‌رمه ب تایبه‌تى نوكه كو گوندور و به‌رهه‌مێن وه‌كو وان به‌ر ب دوماهیێ ڤه دچیت).
زێده‌تر گۆت: (رۆژانه نێزیكێ 10 بو 15 پیكئاب لسه‌ر جادده‌یا گشتى یا سه‌نته‌رێ بازارێ شێلادزێ ب شه‌ڤ و رۆژ د راوستاینه و گوندوران دفروشن، و ئه‌ڤ یه‌ك بو هه‌ند گه‌نجان بویه ده‌لیڤه كو داهاته‌كێ بو خێزانێن خوه ده‌ستڤه‌بینن).
