ب ڤیدیۆ- مه‌زنترین پرۆژێ ب خودانكرنا چێل و مه‌هێن شیرى ل ده‌ڤه‌را بارزان
ئه‌ڤرۆ نیوز ، نه‌وزاد هلۆرى:
ئێك ژ مه‌زنترین پرۆژێن ب خودانكرنا ته‌رش و كه‌والى ل كوردستانێ ل ده‌ڤه‌را بارزان هاتیه درۆستكرن ، كو شیانێن هزار و 500 كیلویێن شیرى رۆژانه هه‌یه، و خودانێ پرۆژه‌ى دده‌ت دیاركرن كو ئه‌وان ل به‌ره پرۆژه‌ى خوه به‌فره‌هتر بكه‌ن، و چێلێن گوشتى ژى ب خودان بكه‌ن.
مه‌دیه‌ن سه‌باح بارزانى خودانێ پرۆژه‌ى بۆ ئه‌ڤرۆ نیوز گۆت: (پرۆژێ خودانكرنا گه‌زى یێ ته‌رش و كه‌والى كو چێل و مه‌هێن شیرى بخوڤه دگریت ئێكه ژ مه‌زنترین پرۆژێن خودانكرنا ته‌رش و كه‌والێ شیرى ل كوردستانێ و شیانێن نێزیكێ هزار و 500 كیلویێن شیرى هه‌نه).
زێده‌تر گۆت: (خودانكرنا ته‌رش و كه‌والى د پرۆژێ مه‌دا ب شێوازه‌كێ زانستى و مودێرنه ، و ئالفێ وان هه‌ر دناڤ پرۆژه‌ى دا دهێته چاندن و وه‌به‌رهێنان، كو ئه‌و ژى ئنجه‌یه، و دوشتنا چێلان ژى ب رێیا ئامیرێن زانستى یه، زێده‌بارى كو هه‌تا نوكه لایه‌نێن شوله‌ژێ چوو هاریكارى بو پرۆژێ مه نه‌كرینه، به‌لێ مه ل به‌ره زێده‌تر گرنگیێ ب پرۆژه‌ى بده‌ین و چێلێن گوشتى ژى بینینه ناڤا پرۆژه‌ى).
شه‌عبان ره‌مه‌زان، سه‌رپه‌رشتێ پرۆژه‌ى بۆ ئه‌ڤرۆ نیوز گۆت: (نوكه دناڤا پرۆژه‌ێ ب خودانكرنا ته‌رش و كه‌والێ گه‌زى 200 چێل و 400 مه‌هێن شیرى هه‌نه، و هه‌موو ژى لسه‌ر ئنجه‌ى دهێته بخودانكرن، و د پروژه‌ى دا 20 كرێكارێن باژێرێ حه‌له‌بێ و رۆژئاڤایێ كوردستانێ كاردكه‌ن ژبه‌ركو شاره‌زایه‌كا تایبه‌ت هه‌یه، و نێزیكێ شه‌ش ژ وان كچ و ژنن).
مریه‌م كو ئێكه ژ وان ژنێن دناڤ پرۆژه‌ى دا كاردكه‌ت و سه‌رپه‌رشتیێ ل دوشتنا چێل و مه‌هان دكه‌ت بۆ ئه‌ڤرۆ نیوز گۆت: (ژبه‌ركو چێل و مه‌هێن مه ب ئنجه‌ى دهێنه بخودانكرن و خوارنه‌كا ساخله‌م و گرنگه رۆژانه هه‌ر چێله‌ك 10 بو 30 كیلویێن شیرى به‌رهه‌مدئینن، , ئه‌م هه‌ر دناڤ پرۆژه‌ى دا دكه‌ینه دولكێن تایبه‌ت و ره‌وانه‌یێ بازارى دكه‌ین و نها كیلویا شیرى ب 750 دیناران دهێته فروتن، و هه‌ر چه‌ند خودانكرنا وان ماندوبوونه و بهایێ شیرى ئه‌رزانه ، به‌لێ كاره‌ك گرنگ و باشه دنوكه دا)
پرۆژێ گه‌زى لسه‌ر رووبه‌رێ نێزیكێ 50 دونه‌مێن عه‌ردى لسه‌ر رووبارێ زێ مه‌زن ل گوندێ بالندا هاتیه درۆستكرن و پێكدهێت ژ چاندنا ئالفى و خودانكرنا چێل و مه‌ها و سیسته‌مێ دوشتنا چێل و مه‌ها، و داگرتنا شیرى بو ناڤا دولكێن تایبه‌ت و ره‌وانه‌كرنا وان بو بازارى كو ئه‌ڤ یه‌ك ژى دهێته هژمارتن ئێك ژ باشترین پرۆژێن ب خودانكرنا ته‌رش و كه‌والى ل كوردستان و ده‌ڤه‌را بارزان.
مه‌دیه‌ن سه‌باح بارزانى، خودانێ پرۆژه‌ى دیاركر ژى كو نه‌بوونا پشته‌ڤانیێ ژلایێ حوكمه‌ت و لایه‌نێن په‌یوه‌ندیدار و نه‌بوونا بازاره‌كێ بو فروتنا به‌رهه‌مێ شیرى بویه سه‌ده‌م كو هزر د كێمكرنا سه‌رێن ئاژه‌لى دا بكه‌ن و زێده‌تر گۆت: (من ڤیا ب رێیا پرۆژه‌یه‌كێ مه‌زن یێ خودانكرنا ته‌رش و كه‌والى خزمه‌تا ده‌ڤه‌را خوه بكه‌م، ول گه‌ل خوه زێده‌تر ژ 20 كرێكاران ژى بده‌م كارى ، و جوداهیا پرۆژێ من ئه‌وه كو به‌رهه‌مئینانا ئالفى و ئامیرێن زانستى و خودانكرنا ته‌رش و كه‌والى هه‌موو ل دناڤ پرۆژه‌ى بخوه دایه، و نوكه نێزیكێ 200 چێل ژ جورێ فریزى هوله‌ندى یێن شیرى مه هه‌نه ،و بڤێ یه‌كێ رۆژانه نێزیكێ سێ ته‌نێن شیرى دهاتنه به‌رهه‌مئینان ، به‌لێ ژبه‌رنه‌بوونا چوو كارگه‌هێن ماستى به‌رهه‌مێ مه ب ئه‌رزانى دهاته فروتن).
محه‌مه‌د مێرگه‌سوورى، رێڤه‌به‌رێ چاندنا مێرگه‌سوور بو ئه‌ڤرۆ نیوز گۆت: (پرۆژێ خودانكرنا چێل و مه‌رێن شیرى ل گوندێ بالندا و ده‌ڤه‌را بارزان ئێكه ژ پرۆژێن نموونه و سالانه رێژه‌یه‌كا باش یا پێدڤیێن شیر و ماستى بو بازارێن نافخوه دابین دكه‌ت به‌لێ هه‌تا نوكه حوكمه‌تێ چوو هه‌ڤكارى بو خودانێن پرۆژه‌ى نه‌كرینه، و گرنگترین تشت كو لایه‌نێن شوله‌ژێ وه‌كو پشته‌ڤانى بو خودانێن پرۆژێن بڤى ره‌نگى بكه‌ت ئه‌وه كو نه‌هێلیت شیرێ هاورده و ماسێ هاورده بهێته كوردستانێ و چه‌ند كارگه‌هێن ماستى بهێنه چێكرن).
