ب ڤەكێشانا هێزێن ئەمریكی رەوشا سیاسی و ئەمنی یا ئیراقێ یا ئارام نابیت
مالپەرێ (بەغداد ئەلیەوم) یێ ئیراقی د شرۆڤەكرنەكێدا بەلاڤكر: ل گەل نێزیكبوونا ڤەكێشانا هێزێن ئەمریكی ژ ئیراقێ، هۆشداریێن ل دۆر دەرئەنجامێن وێ پرۆسەیێ ل سەر رەوشا ئەمنی و سیاسی وئابۆری یا ئیراقێ زێدەتر دبن و ل دووڤ بۆچوونا شارەزایێن ستراتیژی، ڤەكێشانا بێ پلان و ژ نشكەكێڤە یا هێزێن ئەمریكی، دێ ڤالاتییەكا ئەمنی یا مەزن و نە ئارامییا سیاسی دروست كەت.
ریاز وەحیلی، چاڤدێرێ سیاسی، بۆ وی مالپەری راگەهاند» گرنگترین مەترسیێن كو دێ ژ ڤەكێشانا هێزێن ئەمریكی دروست بن، پەیدابوونا ڤالاتییا ئەمنییە ژ بەر نەبوونا پشتەڤانییا تەكنیكی و هەوالگیری بۆ هێزێن ئیراقی ژبۆ روو ب رووبوونا تیرۆری».
شارەزا و چاڤدێرێن سیاسی دوپات دكەن كو ئەزموونا سالا 2011 هێشتا مایە، دەمێ ڤەكێشانا پێشوەخت یا هێزێن ئەمریكی بوویە ئەگەرێ پەیدابوونا داعشێ و كونترۆلكرنا ئێك ل سەر سێ ئاخا ئیراقێ تنێ پشتی دەمێ دو سالان ژ ڤەكێشانا هێزێن ئەمریكی. ل گەل بەردەوامییا چالاكیێن شانێن نڤستی یێن داعشێ، ترسا وێ چەندێ هەیە ئەڤ سیناریۆیە دوبارە ببیت كو هەتا نوكە ژی ئیراق بۆ هەوالگیریێ و كارێن لۆجستی پشتبەستن ب ئەمریكا كریە».
ریاز وەحیلی گوت» دلگرانییا دویێ پەیوەندی ب ئەگەرێ گەشەكرنا كاریگەرییا پشكەك ژ گرۆپێن چەكداریڤە هەیە ل سەر حیسابا دەزگەهێن دەولەتێ و گەف ل سەروەرییا قانوونێ و سەروەرییا دەولەتێ».
هەروەسا ئاماژەكر» پرسا سیێ پەیوەندی ب كاریگەرییێن راستەوخوەیێن دەڤەرێڤە هەیە، كو دبیت ئالیێن هەرێمی بزاڤا پڕكرنا وێ ڤالاتیێ بكەن، ئەڤ چەندە ژی دێ كاریگەرییا نەرێنی ل سەر ئارامییا ئیراقێ هەبیت و دێ كەتە مەیدانەك بۆ ململانێیا ب وەكالەت و پرسا چارێ ژی پەیوەندی ب ئالیێ ئابۆریڤە هەیە، ب تایبەت سەبارەت ب وەبەرئێنانا بیانی و كەرتێ وزێ، چونكە ئارامییا ئەمنی ئەگەرەكێ سەرەكییە بۆ راكێشانا كۆمپانیێن نێڤدەولەتی».
ئەوژی دیاركر» وەبەرئێنان د كەرتێ پەترۆلێ و وزەیێدا گرێدایە ب گرەنتییا ئەمنیڤە. هەر جۆرەك گرفتەك د ڤی ئالیدا وەدكەت ئیراق كێمتر سەرنجراكێش بیت بۆ كۆمپانیێن نێڤدەولەتی، ڤێ چەندێ ژی دێ كاریگەری ل سەر پلانێن گەشەپێدانا ئابۆری هەبیت».
سەبارەت دلگرانییا پێنجی، دبێژیت» كارڤەدانا سیاسی یا ناڤخوەیە، دیارترین ئەو كارڤەدان ژی دابەشبوونە د ناڤبەرا هێزێن ئیراقی د ناڤبەرا ئەو كەسێن پشتەڤانیێ ل ڤەكێشانا هێزێن ئەمریكی دكەن و ئەوێن دژایەتییا ڤەكێشانا وان دكەن، ئەڤ چەندە ژی دێ دابەشبوونا سیاسی توندتر كەت و ئێكڕیزییا بڕیاردانا نیشتمانی لاوازتر كەت».
ل دووڤ پێزانێن دەزگەهێن راگەهاندنێ ئاماژێ پێ ددەن، بڕیارە ل نێزیك هێزێن ئەمریكی ژ ئیراقێ بهێنە ڤەكێشان و گرانییا سەربازی و دپلۆماسییا خوە ژ باشوور و ناڤەڕاستا ئیراقێ بۆ جهەكێ دی ڤەگوهێزن.
