ب کەساتیا سالێ ھاتە ھەلبژارتن
ئەڤرۆ نیوز:
پەرلەمانتارا ئێزدیان ل جڤاتا نوونەرێن عیراقێ، ل سەر لیستا پارتی دیمۆکراتی کوردستان، وەکو ئێکەم ژن ل سەر ئاستێ ھەمی وەلاتێن عەرەبی ژ ئالیێ سازیەکەکا لبنانی ھاتە دەستنیشانکرن.
سازیا دەستپێشخەری و رێزلێنانێ “موبادەرە و تەکریم” یا لبنانی د چارچوڤێ بزاڤێن خوە یێن سالانە دا بۆ رێزلێنانێ ل داھێنەر و بزاڤێن بیاڤێ ژنان و مافێن مرۆڤی و زانست و تەکنۆلۆژیایێ ل سەر ئاستێ وەلاتێن عەرەبی، ڤیان دەخیل پەرلەمانتارا ئێزدیان ل جڤاتا نوونەرێن عیراقێ ل سەر لیستا پارتی دیمۆکراتی کوردستان، وەکو ئێکەم ژن ل سەر ئاستێ وەلاتێن عەرەبی دەستنیشان کر.
ڤیان دەخیل، پەرلەمانتارا جڤاتا نوونەرێن عیراقێ پشتی وەرگرتنا خەلاتی راگەھاند، ئەڤە سال و نیڤە ئەوێ ھەست ب خۆشیێ نەکریە، لێ نھا ئەو ھەست ب خۆشیێ دکەت، نەکو ژبەر وەرگرتنا خەلاتی، بەلکو ژبەرکو شنگال ھاتیە ئازادکرن و ھیڤی خوازە کچ و ژنێن ئێزدی یێن د دەست داعشێ دا ماین، بھێنە رزگارکرن.
ڤیان دەخیل گۆت ژی “ھەتا نھا سێ ھزار و ٦٠٠ کچ و ژنێن ئێزدی د دەست داعشێ دا ماینە تیرۆرستێن وێ رێکخستنێ رەفتارێن نەمرۆڤانە ل گەل دکەن”.