ب گه‌شبینی ده‌ستپێكرن، ل دووماهیێ ده‌ست ڤالا ڤه‌گه‌ڕیان
محه‌مه‌دعه‌لی نوری
پشتی ب دووماهی هاتنا هه‌ڤڕكیێن خولا پلا ئێكا كوردستانێ یا فتبۆلێ هه‌رسێ یانه‌یێن پارێزگه‌هێ، دهۆك، سێمێل و ته‌ناهی ب ده‌ستڤالا و مانا خوه بۆوه‌رزێ بهێت پاراست ئه‌وا هه‌ردو یانه‌یێن قه‌لادزێ و هه‌لۆ پلێتا ده‌ربازبوونێ بۆ پلا نایاب ب ده‌ستڤه بینن.
هه‌كه ئه‌م ڤه‌گه‌ڕینه به‌ری ده‌ستتپێكرنا خولا پلا ئێك هه‌رسێ یانه‌یێن پارێزگه‌هێ ب درۆشمێ گه‌شبینی و دێ بزاڤێ كه‌ین و دێ هه‌ڤڕكیێ بۆ ده‌ستڤه ئینانا پلێته‌كا ده‌ربازبوون كه‌ین، دبیت مه هه‌موویان ده‌ستپێكێ ئه‌و پێشبینی كربیت كو تیما دهۆك دێ هه‌ڤڕكه‌كا بهێزبیت بۆ پلێتا نایاب ئه‌وا ل وه‌رزێ بۆری پاشڤه‌هاتییه پلا ئێك، لێ ئه‌نجامێن ده‌سپێكی ئه‌و پێشبینی لاوازكرن تایبه‌ت د حه‌فت یاریێن ده‌سپێكی دا كو چار خوساره‌تی، دو وه‌كهه‌ڤی و ئێك سه‌ركه‌فتن هه‌بوو، مه هزر دكر گوهۆڕینا ڕاهینه‌ری دێ ڤه‌گه‌ڕیانا بهێزبیت لێ ئه‌نجامێن لاواز به‌رده‌وام بوون و تا دووماهییا خولێ جهێ خوه ل رێزا نه‌هێ كرن 14 خال كۆمكرن بتنێ سێ سه‌ركه‌فتن، پێنج وه‌كهه‌ڤی و پێنج خوساره‌تی و هیچ هیڤییه‌كا ده‌ربازبوونێ نه‌بوویه.
ژلایێ خوه‌ڤه یانه‌یا سێمێلێ ئه‌وا كارێ خوه باش كربوو ب ئینانا سێ یاریزانێن پیشه‌كار و كۆمه‌كا یێن نافخوه خودان سه‌ربۆر، داخویانیێن كارگێرییا یانه‌یێ ژی ڕژدی بۆ پلا نایابێ بوون، ئه‌وا ئه‌ڤه نێزیكی13 ساله هیڤیێن ده‌ربازبوونێ دكه‌ت، لێ ئه‌نجامێن وێ دناڤ یاریگه‌هێ دا به‌رۆڤاژی ئه‌و هیڤی و ئارمانجان بوو تایبه‌ت پشتی ژ ده‌ستدانا زێده‌تر هه‌شت یاریزانێن خوه یێن سه‌ره‌كی ئه‌وێن ژبه‌ر ڕاوه‌ستیانا پشته‌ڤانییا دارایی تیم هێلایی، ئه‌ڤچه‌نده وه‌كر سێمێل ژ خه‌ونا خوه بێ هیڤی بیت و بتنێ مانا خوه پاراست، ل رێزا 10ێ ڕاوه‌ستیایی ب13 خالان ژ سێ سه‌ركه‌فتن، چار وه‌كهه‌ڤی و شه‌ش خوساره‌تییان.
ژلایه‌كێ دووڤه داخویانیێن به‌رپرسێن یانه‌یا ته‌ناهی د ئاشكه‌را بوون ئه‌وژی هه‌كه پشته‌ڤانییا دارایی بهێته كرن دێ شێن هه‌ڤڕكیێ كه‌ین، دناڤا یاریگه‌هێ دا ده‌سپێكه‌كا ناڤنچی دا هاتنه دیتن، د حه‌فت یاریێن ده‌سپێكی دا پێنج وه‌كهه‌ڤی ئینابوون، ئێك سه‌ركه‌فتن و ئێك خوساره‌تی، ب دووماهی هاتنا خولێ ل رێزا 11ێ راوه‌ستیا ب 12 خالان ژ دو سه‌ركه‌فتن، شه‌ش وه‌كهه‌ڤی و پێنج خوساره‌تییان.
ل دووماهیێ یا من دڤێت بێژم مخابن چو یانه‌یێن پارێزگه‌هێ نه‌شیان پلێته‌كا ده‌ربازبوونێ بۆ نایاب وه‌ربگرن، ئه‌ڤچه‌نده ژی ئه‌گه‌رێن جودا هه‌نه، دبیت پشته‌ڤانییا دارایی تاكه ئه‌گه‌رێ سه‌ره‌كی بیت، من هیڤییه‌ك ژ كارگێریێن هه‌رسێ یانه‌یێن مه هه‌نه، هه‌كه دارایی ئه‌گه‌رێ سه‌ره‌كی بیت و چاڤه‌ڕێ بتنێ ئێك ژێده‌ربن ئه‌وژی حكومه‌ت بیت، ئێدی بزاڤێن مه‌زن بكه‌ن و حوكمه‌تێ ڕازیبكه‌ن بۆئینانا سپۆنسه‌رێ زه‌بلاح و پشته‌ڤانیه‌كا مه‌زن بیت، ژبه‌ركو خولا كوردستانێ بتنێ چار مه‌هن ئانكو چو پاره‌كێ مه‌زن بۆ یانه‌یان نا هێته خه‌رجكرن، ب هیڤینه گرنگی ب خولا كوردستانێ بهێته دانان بۆ خاترا كوڕێن باژێرێ خوه و پێشئێخستنا وه‌رزشا پارێزگه‌هێ.
