ب گوهۆڕینا راهێنه‌ری زاخۆ ڤه‌گه‌ڕیا سه‌ركه‌فتنان
ئه‌ڤرۆ، قه‌یس وه‌یس
پشتی كارگێریا یانا زاخۆ یا وه‌رزشی رازیبووی ل سه‌ر بڕیارا ده‌ستكاركێشانا راهێنه‌رێ تیما خوه یا ته‌پا پێی د خولا پلا نایابا ئیراقێ عه‌بدولوه‌هاب ئه‌بولهێل و هاتنا راهێنه‌رێ نوو فیراس ئه‌لخه‌تیب د دو یاریێن ڤێ دووماهیێ دا دوباره تیما وان ڤه‌گه‌ڕیا سه‌ركه‌فتنان.
راهێنه‌رێ سوری فیراس ئه‌لخه‌تیب به‌ری چه‌ند سالان وه‌كو یاریزانێ زاخۆ ڤه‌گه‌ڕیایه و ئه‌ركێ راهێنه‌راتیێ وه‌رگرتیه شیا د یاریا ئێكێ دا ئه‌وا ل گه‌ل یانا هه‌ولێرێ ل یاریگه‌ها شه‌هید فرانسۆ حه‌ریری تیما زاخۆ به‌ره ب سه‌ركه‌فتنه‌كا گرنگ ل سه‌ر خودانێن ئه‌ردی ببه‌ت ب سێ گۆلان به‌رامبه‌ر گۆله‌كێ، هه‌روه‌سان د یاریا دویێ دا ئه‌وا ل پێنچ شه‌مبیا بوری هاتیه كرن كو بڕیاربوو ل یاریگه‌ها زاخۆ یا نێڤده‌وله‌تی هاتبا كرن لێ ژبه‌ر سزایێن ئێكه‌تیا ته‌پا پێی یا ئیراقێ لسه‌ر نوونه‌را پارێزگه‌هێ ب نه به‌رهه‌ڤبوونا جه‌ماوه‌ری و یاری ژ ده‌رڤه‌یی یاریگه‌ها وێ دا، له‌ورا یاریگه‌ها یانا دهۆك هاتبوو ده‌ستنیشانكرن و یاری ل وێ یاریگه‌هێ ئه‌نجامدا و مێڤانداریا یانا نه‌فت ئه‌لبه‌سرا كری و شیا سه‌ركه‌فتنا دویێ بینت ب دو گۆلا به‌رامبه‌ر گۆله‌كێ و ب 48 خالان رێزا هه‌شتێ دهێت.
بڕیاره ل پێنچ شه‌مبیا بهێت یانا زاخۆ ل باژێرێ به‌غدا ببیته مێڤانا یانا زه‌ورا ئێك ژ بهێزترین یاریێن كوڕێن خابیر و تاقیكرنه‌كا بهێز دا ژبۆ به‌رده‌وامیا سه‌ركه‌فتنان.
