ب گوژمێ حەفت ملیار دیناران هژمارەكا پرۆژەیان ل چەمانكێ ل ژێر بجهئینانێ نە
ئامێدیێ، مەحمود نهێلی
ب گوژمێ پتر ژ 7 ملیار دیناران پرۆژە ل سنوورێ ناوچەدارییا چەمانكی ل ژێر بجهئینانێ نە و هند ژ وانا ژی بەرڤ دووماهیێ نە. رێڤەبەرێ ناوچەدارییا چەمانكێ ژی دبێژیت: ئەو پرۆژەیێن نوكە ل ژێر بجهئینانێ پێك دهێن ژ پرۆژێن ئاڤا ڤەخوارنێ و گوهارتنا تۆرا ئاڤا چەمانكی و گەهاندنا كارەبێ و ڤەكرنا رێیا، ب تایبەتی ژی رێیێن جهێن گوزاری و چەم و ئاقارێن جوتیاران.
ئیسماعیل حەمید رێڤەبەرێ ناوچەدارییا چەمانكێ بۆ رۆژناما ئەڤرۆ دیاركر، د دوو سالێن دەربازبوویی دا ل سنوورێ ناوچەدارییا چەمانكی هەژمارەكا زۆرا یا پرۆژان كەفتینە د قوناغا ب جهئینانێ دا و گەلەك ژ وان ژی نوكە ب داوی هاتینە و كەفتینە د خزمەتا خەلكێ دەڤەرێ دا.
ناڤهاتی دیار ژی كر، ئەو پرۆژێن نوكە گەهشتیە قوناغێن دووماهیێ پێك دهێن ژ گەهاندنا رێكێ ژ چەلوكێ بۆ سیارێ و چەلوكێ بۆ سپیندارێ كو دێ بیتە رێكەكا سەرەكی یا هاتن و چونا وەلاتیان ژ چەمانكی بۆ سیارەتیكا و قێكرنا جادەیەكا گەشتیاری یە كو دێ كەرتێ گەشتیاری ب تایبەتی ژی گەلیێ چەمانكی خورتتر لێكەتن و دگەل گەهاندنا هێلا كارەبێ یە بۆ وان جهێن گەشتیاری ل گەلیێ چەمانكێ.
ناڤهاتی ئاشكرا كر، كارێ چێكرنا جوتسایدێ چەمانكێ گەهشتیە قوناغێن دووماهیێ و ئیستلاما ئێكێ هاتیە كرن و بەری ب داوی بهێت مە كار ل سەر رووناهیكرن و خەملاندنا جادەیێ وەكو دیزانەكا جوان كریە و گۆت: بۆ ئێكەم جارە مە ئاڤا ڤەخوارنێ گەهاندیە گوندێ مێزێ كو گوندەكێ مەسیحیانە و گوندێ بێركیاتێ و بەرئاشێ و زێدەباری تۆرا ئاڤا چەمانكێ هەموو هاتیە گوهارتن ل دووڤ ساخلەتێن نوو .
ناڤبری گۆت ژی: ل سەنتەرێ ناوچەدارییا چەمانكێ ل دو تاخان كولانێن وان هاتینە چێكرن و ژ نوو هاتینە ڤەكرن و تێكەلەكرن و نوكە د قوناغێن قێركرنێ دا نە، ژ بۆ ئەنجامدانا ڤان پرۆژەیان گۆژمێ پتر ژ حەفت ملیار دیناران بۆ هاتینە تەرخانكرن.
و تەكەز كر، ئەو بابەتێ ئەو ل سەر راوەستن ئەوە شەنگەستەیەكی باژێری ل ڤێرێ دانن و كار ل سەر بكەن و خزمەتگوزاریێن دەستپێكێ بگەهیننە هەموو جهان و گۆت: بۆ داهاتوو ژی وان پلان هەیە بۆ گەهاندنا كارەبێ و ئاڤێ بۆ وان گوندان یێن پێدڤی پێ هەی، وەكو گوندێ گەڤەركێ و هژمارەكا دی یا گوندێن سنوورێ ناوچەدارییا چەمانكی.
