ب گوژمێ دو ملیۆن دۆلاران پشكا زارۆبوونێ ل ئاكرێ هاته ڤه‌كرن
دهۆك، له‌زگین جوقی:
ب ئاماده‌بوونا د. سامان به‌رزنجی، وه‌زیرێ ساخله‌میێ ل حوكمه‌تا هه‌رێما كوردستانی َو رێڤه‌به‌رێ گشتی یێ ساخله‌میا پارێزگه‌ها دهۆكێ و قایمقامێ قه‌زا ئاكرێ دوهی 19/9/2021 د رێوره‌سمه‌كێ تایبه‌ت دا هۆلێن زارۆكبوونێ و قایشێن نه‌خۆشان ل نه‌خۆشخانا ئاكرێ هاتنه ڤه‌كرن.
د. سامان به‌رزنجی، وه‌زیرێ ساخله‌میێ ل هه‌رێما كوردستانێ د كۆنگره‌كێ رۆژنامه‌ڤانی دا راگه‌هاند: “هه‌موو پێدڤیێن ساخله‌میێ بۆ نه‌خۆشخانا ئاكرێ هاتینه دابینكرن و باشتر خزمه‌تا خه‌لكێ ئاكرێ دێ هێته كرن، نه‌خۆشخانا ژن و زارۆكبوونێ ب شێوه‌كێ باش هاتیه دروستكرن، ئه‌م سوپاسیا وه‌لاتێ ئیتالیا دكه‌ین بۆ پشته‌ڤانی و هاریكاریا وان دگه‌ل ده‌زگه‌هێن ساخله‌میێ دا”.
گۆتژی: “چه‌ند هۆلێن نشته‌گه‌ریان و زارۆكبوونێ د ناڤ نه‌خۆشخانێ دا هاتینه دروستكرن، ئه‌ڤه گه‌له‌كا گرنگه و چه‌ندین خزمه‌تێن ساخله‌میێ د ناڤ نه‌خۆشخانێ دا هه‌نه و خزمه‌ته‌كا باش پێشكێشی نه‌خۆشان دێ هێته كرن، خه‌لكێ هه‌موو ده‌ڤه‌رێن سه‌ر ب قه‌زا ئاكرێ ڤه ژ ڤی پرۆژێ گرنگێ ساخله‌میێ دێ مفادار بن”.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ، د كۆنگره‌كێ رۆژنامه‌ڤانی دا گۆت: “ئێك ژ پرۆژه‌یێن وه‌لاتێ ئیتالیا ل قه‌زا ئاكرێ كو ب رێیا رێكخراوا ئایسپۆ ئه‌نجام دای، دوهی 19/9/2021 هاته ڤه‌كرن، ئه‌و ژی پرۆژه‌یێ به‌رفره‌هكرن و نووژه‌نكرنا نه‌خۆشخانا ژن و زارۆكبوونێ بوو ل ئاكرێ، 31 ته‌ختێن زارۆكبوونێ د ناڤ نه‌خۆشخانێ دا هه‌نه و ب گوژمێ دو ملیۆن دۆلاران كار د نووژه‌نكرن و به‌رفره‌هكرنا نه‌خۆشخانا ئاكرێ دا هاتیه كرن، هه‌موو كه‌لوپه‌لێن نۆشداری بۆ نه‌خۆشخانا ئاكرێ هاتینه دابینكرن”.
