ب گوژمێ زێدەتر ژ 230 ملیون دیناران شكەفتا چارستوون ل ژێر نووژەنكرنێ یە
ئەمیر ئەترووشی:
رێڤەبەرێ شوونوار و كەلەپۆرێ كوردی ل پارێزگەها دهۆكێ دیاركر، بۆ دەمێ نێزیكێ سالەكێیە كارێ نووژەنكرنا شكەفتا چوارستین بەردەوامە و گۆت: ل دووڤ زانیاریێن رێڤەبەریا شونوارێن دهۆكێ ل سنورێ پارێزگەها دهوكێ زێدەتری دوو هزار و دووسەد جهێن شونواریێن توماركری و فەرمی هەنە.
د. بێكەس بریفكانی رێڤەبەرێ شوونوار و كەلەپۆرێ كوردی ل پارێزگەها دهۆكێ بۆ رۆژنامەیا ئەڤرۆ راگەهاند، ب گوژمێ 124 ملیۆن دیناران كۆ ژ لایێ پارێزگەها دهوكێ و 731 هزار دۆلار ژی ژ لایێ ئێكەتییا ئەوروپاڤە هاتنە دابین كرن بۆ نووژەنكرنا شكەفتا چوارستین ل پارێزگەها دهوكێ، شوونەوارناس ژی ئێكدەنگن ل سەر وێ چەندێ كۆ پووتەدان ب جهێن شوونواری دبیتە ئەگەرێ هندێ سەكتەرێ گەشت و گوزارێ ژی پێشڤەبچیت.
گۆت ژی: شكەفتا چوارستین ئێك ژ وان شونوارێن گرنگێن پارێزگەها دهوكێیە كۆ جهەكێ شونواریێ ئاساییە و بۆ سەردەمێ بەری زاینی دزڤریت و جهەكێ ئاینیێ زەردەشتیانە دڤێت ب هوشیاریا شوونواری دناڤ جڤاكێ كوردیدا هەبیت.
ئاشكرا كر، كار بەردەوام دهێتە كرن بۆ هندێ جهێن شونواری بهێنە پاراستن و سەخبێریكرن، شكەفتا چوارستین ئێك ژ وان جهایە كار ل سەر دهێتە كرن وەك كۆمەلگەهەكا شوونواری و گەشت و گوزاری بۆ گەشتیاران بهێتە دیاركرن، ئەڤ كارە د چارچۆڤێ هەوەكا بەرفرەهدا دهێتە كرن ژ بۆ پاراستن و نووژەنكرنا جهێن شونواری ل كوردستانێ ب مەرەما وێ چەندێ ژ مەترسیا ژناڤچوونێ بهێنە پاراستن.
دیار كر، ل دووڤ زانیاریێن رێڤەبەریا شونوارێن دهۆكێ ل سنورێ پارێزگەها دهوكێ زێدەتری دوو هزار و دووسەد جهێن شونواریێن توماركری و فەرمی هەنە.
