ب گوژمێ نێزیكی چار ملیار دیناران پڕۆژە ل ناوچەداریا بجیلێ دهێنە بجهئینان
ئاكرێ، صەباح زوهیر:
بروا فاروق سەعید، رێڤەبەرێ ناوچەداریا بجیلێ بۆ ئەڤرۆ دیار كر، هەژمارەكا پڕۆژەیێن خزمەتگوزاری د كەرتێن جودا دا ب گوژمێ نێزیكی چار ملیار دیناران ل ناوچەداریا بجیلێ دهێنە بجهئینان.
ناڤهاتی گۆت: «پڕۆژەیێ رێكا گوندێ شەرفونا و كەندەگول كو پێنج گوندان بخوەڤە دگریت ب درێژاهیا 10 كیلۆمەتران و ب گوژمێ ملیارەك و 13 ملیۆن دیناران دهێتە بجهئینان، دیسا پڕۆژەیێ بەنداڤا بجیل ژی، كو ئێك ژ پڕۆژەیێن گرنگە بۆ دەڤەرێ و 13 هزار مكەعبێن ئاڤێ عمبار كەت و نوكە 10% هاتیە بجهئینان».
خویا ژی كر، قوتابخانەكا 18 پۆلی ل سەنتەرێ ناوچەداریێ و قوتابخانەكا شەش پۆلی ل گوندێ سەرسۆر دێ هێنە بجهئینان، دیسا پڕۆژەیێ كارگەها غازێ، كو یێ كەرتێ تایبەتە و نوكە نێزیكی 50%ێ پڕۆژە تەمابوویە.
رێڤەبەرێ ناوچەداریا بجیلێ ئاشكرا ژی كر كو چەندین پڕۆژێن دی د پلانا وان هەنە و وان ب نڤیسارێن فەرمی گەهاندینە پارێزگەها دهۆكێ و چاڤەرێی بەرسڤێ نە.
