ب گوژمێ 35 ملیار دیناران پرۆژه‌یێن جادده‌یان ل دهۆكێ دهێنه بجهئینان
دهۆك، له‌زگین جوقی:
رێڤه‌به‌را گشتی یا رێك و پران ل پارێزگه‌ها دهۆكێ دیار كر، حوكمه‌تا هه‌رێما كوردستانێ گرنگیه‌كا زۆر دایه چێكرنا جاده‌یان و دبێژیت: نوكه ل پارێزگه‌ها دهۆكێ ب گوژمێ پتر ژ 35 ملیار دیناران پرۆژه‌یێن چێكرنا جاده‌یان یێن د قووناغێن بجهئینانێ دا.
خه‌دیجه محه‌مه‌د، رێڤه‌به‌را گشتی یا رێك و پرا ن ل پارێزگه‌ها دهۆكێ بۆ رۆژناما ئه‌ڤرۆ گۆت: “ژ گرنگترین پرۆژێن نوكه ل دهۆكێ د بیاڤێ چێكرنا جاده‌یان دا دهێنه بجهئینان، پرۆژێ چێكرنا رێیا چیایێ مه‌تینا و به‌رێ سیلێ یه ب درێژاهیا هه‌شت كیلۆمه‌تران و ب گوژمێ نه‌ه ملیار و 990 ملیۆن دیناران، ئه‌ڤ پرۆژه ب ریژا 65% هاتیه بجهئینان، ده‌مێ پرۆژه‌ی 360 رۆژن”.
گۆتژی: “نوكه پرۆژێ رێیا دهۆك و زاخۆ و سێمیل دگه‌ل چێكرنا ئوڤه‌رپاسا سێمێلێ كار ل سه‌ر یێ به‌رده‌وامه و گۆژمێ چار ملیار و 219 ملیۆن دینار بۆ بجهئینانا وی هاتینه ته‌رخانكرن و نوكه پرۆژه ب رێژا 41% ب دووماهی هاتیه، هه‌روه‌سا پرۆژه‌یێ ئه‌نده‌رپاسا نیۆ زاخۆ ژی ب گۆژمێ پتر ژ سێ ملیار دیناران د قووناغا بجهئینانی دایه”.
ناڤهاتیێ ئاشكرا ژی كر كو پرۆژه‌یێ رێیا داره‌تۆ ژی ب گوژمێ 14 ملیار دیناران نوكه د قووناغا بجهئینانێ دایه و ب رێژا 23% پرۆژه هاتیه بجهئینان و كار د چێكرنا ڤی پرۆژه‌یی دا یێ به‌رده‌وامه، دیسا ب گوژمێ 244 ملیۆن دیناران جاده‌یێن سیاره‌تیكا و سكرینێ و ناحیا سه‌رسنكێ ژی د قوناغێن بجهئینانێ دانه و ب رێژا 95% پرۆژه دووماهی هاتیه.
رێڤه‌به‌را گشتی یا رێك و پران ل پارێزگه‌ها دهۆكێ گۆت: “نوكه ب گوژمێ 478 ملیۆن دیناران پرۆژه‌یێ رێیا گوندێ بێشینكێ و بابوخكێ و دێرگژنیك و بێسفكێ ژی د قووناغا بجهئینانێ دایه و ل ناحیا بجیل و ئاكرێ ژی ب گوژمێ پتر ژ ملیار دیناران هه‌ژماره‌كا پرۆژه‌یێن چێكرن و سه‌خبێركرنا جاده‌یان د قووناغێن بجهئینانێ دانه”.
