ب گوژمێ دو ملیار دیناران پرۆژه ل ناحیا سه‌رسنكێ هاتنه بجهئینان
ئامێدیێ، محمود نهێلی:
د به‌رده‌وامیا گرنگی دانا حكومه‌تا هه‌رێما كوردستانێ ب پرۆژێن خزمه‌تگۆزاری ل ده‌ڤه‌رێ جاددا سه‌ره‌كی یا ده‌رگه‌هێ سه‌رسنكێ و هه‌ژماره‌كا دی یا پرۆژێن خزمه‌تگۆزاری ل سنوورێ ناحیا سه‌رسنكێ كه‌ڤتنه د خزمه‌تا وه‌لاتیان دا.
نه‌شوان حسنی، رێڤه‌به‌رێ ناحیا سه‌رسنكێ بۆ رۆژناما ئه‌ڤرۆ دیار كر، نوكه هه‌ژماره‌كا پرۆژان ل ده‌ڤه‌را وان دهێنه بجهئینان هنده‌ك ژ وان ژی ب دووماهی هاتینه و گۆت: “پرۆژێ رێكخستنا جادا ده‌رگه‌هێ باژێركێ سه‌رسنكێ ب درێژاهیا 700 متران و چێكرنا چار كیلۆمه‌ترێن رێكێن ناڤخوه‌یی ل سه‌رسنكێ و ده‌وروبه‌ران ب دووماهی هاتینه و گوژمێ ملیاره‌ك و 619 ملیۆن دیناران ژلایێ حكومه‌تا هه‌رێما كوردستانێ ڤه بۆ هاتبوونه ته‌رخانكرن”.
ناڤهاتی دیار ژی كر، پرۆژێ چێكرنا رێكێن ناڤخوه‌یی ل كۆمه‌لگه‌ها قه‌دشێ و تاخێ ئازادی ل سه‌رسنكێ كو 468 ملیۆن دینار بۆ هاتبوونه ته‌رخاكرن، نوكه ب دووماهی هاتینه و كه‌ڤتینه د خزمه‌تا وه‌لاتیان دا و گۆت: “ب مه‌ره‌ما پتر خزمه‌تكرنا وه‌لاتیان، هه‌ژماره‌كا دی یا پرۆژه‌یان ژی ل ده‌ڤه‌را مه دێ هێنه بجهئینان”.
دهێته زانین نوكه ژی ب گوژمێ 300 ملیار دیناران پرۆژه ل ده‌ڤه‌را ئامێدیێ دهێنه بجهئینان كو به‌ری نوكه ده‌ست پێ هاتیه كرن و هنده‌ك ژ وانا ژی ب دووماهی هاتینه.
