ب گوژمێ ٣٥ ملیار دیناران پڕۆژەیێن خزمەتگوزاری ل دهۆكێ و دەوروبەران راگەهاندن
د. عەلی تەتەر، پارێزگارێ دهۆكێ د كۆنگرەكێ رۆژنامەڤانی دا دیار كر، ب گوژمێ 35 ملیۆن دیناران پڕۆژەیێن خزمەتگوزاری ل سەنتەرێ باژێرێ دهۆكێ و دەوروبەران دێ هێنە بجهئینان.
د بەردەوامیا پڕۆژەیێن خزمەتگوزاری دا، ئەوێن حوكمەتا هەرێما كوردستانێ ل دەڤەرداریێن جودایێن پارێزگەها دهۆكێ بجه دئینیت، دوهی رۆژا ئێكشەمبی 22/10/2023 د. عەلی تەتەر، پارێزگارێ دهۆكێ سەرەدانا دەڤەرداریا دهۆكێ كر و د كۆنگرەكێ رۆژنامەڤانی دا گۆت: «ب گوژمێ ٣٥ ملیار و ٢٤٦ ملیۆن دیناران و ب رازیبوونا حوكمەتا هەرێما كوردستانێ و ژ دەرئەنجامێ سەرەدانا مەسرور بارزانی، سەرۆكێ حوكمەتا هەرێما كوردستانێ بۆ پارێزگەها دهۆكێ پڕۆژەیێن خزمەتگوزاری ل سەنتەرێ باژێرێ دهۆكێ و دەوروبەران دێ هێنە بجهئینان.
پارێزگارێ دهۆكێ گۆت: «ئەم سوپاسیا سەرۆكێ حوكمەتا هەرێما كوردستانێ دكەین، هەروەسا د ڤێ حەفتیێ دا دێ سەرەدانا دەڤەرداریێن دی یێن پارێزگەها دهۆكێ كەین بۆ راگەهاندنا پڕۆژەیان».
ژ وان پڕۆژەیێن خزمەتگوزاری یێن دوهی پارێزگارێ دهۆكێ راگەهاندین: (دروستكرنا سەنتەرێ لیناك یێ چارەسەریا نەخۆشیا پەنجەشێرێ، تێكەلكرن و كۆنكریتكرنا جاددەیێن تاخێن گژەبەرا، بەرۆشكێ، سەرهلدان و كانی مەهمەدكێ، پڕۆژەیێن رێكێن ناڤخوەیی ل ئەڤریكێ و ئێمینكێ، كۆنكریتكرنا چەند جادان ل تاخێ شێلێ، ڤەكرن و قێركرن و كۆنكریتكرنا چەند كۆلان و جاددەیان ل گەل دروستكرنا دیوارەكێ پالپشت ل كەرتێ ٧٥ شندوخا باشوور، ڤەكرن و قێركرنا جاددەیا ٣٠ مەتری ژ جادا كەمەری هەتا جادا بارزان ل گەل چەند پارچێن كەرتێ ٨٥، ڤەكرن و قێركرنا جاددەیێن ماسیكێ، ڤەكرن و قێركرنا جادەكێ ل كەرتێ ١٣ ل مالتا ئیسلام، ڤەكرن و قێركرنا چەندین جاددەیان ل مالتا سەری، ڤەكرن و قێركرن و كۆنكریتكرنا جاددەیێن ناڤخوە ل تاخێ رەزا، ڤەكرنا كەنالەكێ ڤەكری (سیلاڤ) ژ هێلا ئاڤا بەنداڤا مووسل بۆ بەنداڤا دهۆكێ، پڕۆژەیێن ئاڤێ ل ئێتیت، ئێمینكێ و ئەڤریكێ و دروستكرنا پرەكا پیادە ل سەر رێكا دهۆك بۆ ئامێدیێ ل سەر رێكا بێسرێ.
