ب گوژمێ پتری ملیار دیناران پڕۆژەیێن ئاڤێ ل ئاكرێ دهێنە بجهئینان
ل سنوورێ دەڤەرداریا ئاكرێ و ناوچەداری و گوندێن دەردوور ل وەرزێ هاڤینێ تووشی ئاریشا كێمئاڤیێ دبن و حوكمەتا هەرێمێ ب گوژمێ پتری ملیار دیناران پڕۆژێن ئاڤێ ل وان دەڤەران ئەنجام ددەت، داكو ئاریشەیا كێمئاڤیێ بهێتە چارەسەركرن.
ئەندازیار زرار ئەحمەد سلێمان، رێڤەبەرێ ئاڤا ئاكرێ بۆ ئەڤرۆ گۆت: «حوكمەتا هەرێما كوردستانێ گوژمێ ملیارەك و 121 ملیۆن دیناران بۆ ئەنجامدانا هەژمارەكا پڕۆژەیێن ئاڤا ڤەخوارنێ ل سەنتەرێ ئاكرێ و ناوچەداریێن گردەسێن و بجیل و دینارتە و ئەو گوندێن ئاریشا كێمئاڤیێ هەی، تەرخانكرینە، هەروەسا ب گوژمێ 704 ملیۆن دیناران ژی پڕۆژەیێن ئاڤێ د تەندەری دانە و د دەمەكێ نێزیك دا دێ كەڤنە د بیاڤێ بجهئینانێ دا».
ناڤبری خویا كر، ب رەنگەكێ گشتی ل وەرزێ هاڤینێ ئاریشا كێمیا ئاڤێ دروست دبیت، لێ ب تەمامبوونا پڕۆژەیێ ستراتیژیێ ئاڤا ئاكرێ بۆ دەمێ 25 سالان دێ ئاریشا كێمیا ئاڤێ ل دەڤەرێ چارەسەركەت ل سەنتەرێ ئاكرێ و ناوچەداریا بجیل و 18 گوندێن سەر رێكا پڕۆژەی ل قەندیل و ئاكرێ.
