ب گۆتنا سترانەکا ئەلمانی بەرنیاس بووم
زاخۆ، دلۆڤان :
مالك سامۆ، هونەرمەندێ ڕۆژئاڤایێ کوردستانێ د دیدارەکا هونەری دا بۆ ڕۆژناما ئەڤرۆ دیارکر کو من چەندین ستران و کلیپ هەنە، و هونەرمەند شەریف عومەر و وشبۆ ئیبراهیم و هادی حەموود گەلەك پشتەڤان و هاریکاریا من کرینە د کارێ من یێ هونەری دا، و ل ڤێ دوماهیێ من سترانەك ب شێوێ کوردی و ب زمانێ ئەلمانی ب شێوێ ڤیدیۆ کلیپ بەلاڤکر و ڤێ سترانێ دەنگ ڤەدا، چونکی بابەتێ سترانێ ل دوور بێ ئیقامەیی بوونا من بوویە ل ئەلمانیا کو من دڤێ سترانێ بەحس کریە کو ئەڤە چەندین سالن ئەز ل ئەلمانیا دژیم و من ئیقامە نینە، پشتی هینگێ ب ڕێکا ڤێ سترانێ بوومە خودان ئیقامە.
ناڤهاتی ئاماژە ب وێ چەندێ ژی کر کو ئەز حەز دکەم ب ڕێکا هونەرێ خوە و سترانێن خوە پرەکا بهێز دناڤبەرا فولکلورێ کوردی و ئەلمانی دا دروست بکەم و فولکلورێ کوردی ب جیهانێ هەموویێ بدەمە نیاسین، و د خوازم زاڕۆکێن کورد ل ئەلمانیا پەیوەندیا وان لگەل ڕهـ و ڕیشالێن فولکلورێ وان یێ کوردی بمینیت و فێری زمانێ خوە یێ دایکێ ببن و گۆهداریا هونەرێ کوردی بکەن».
گۆت ژی:»ئەز خەلکێ ڕۆژئاڤایێ کوردستانێ مە ل گۆندێ حەسەکێ، و نوکە ل وەلاتێ ئەلمانیا دژیم، من ئیقاما ئەلمانی وەرگرتیە، و ل دەمێ ئەز بێ ئیقامە بووم ژیانا من یا نەخوەش بوو، و ئەز دووری کەسوکارێن خوە بووم، لێ ڤێ چەندێ کارتێکرن ل من نەکر کو ئەز دەستبەرداری کارێ خوە یێ هونەری بم بەلکو ئەز بەردەوام بووم.»
زێدەتر ژی گۆت:»سترانێن من دەربرینێ ژ وان ئێش و ئازارێن من یێن هینگێ دکەن ل دەمێ کو ئەز ژ کەسوکارێن خوە یێ دوور و غەریبی و ژیانەکا نەخوەش و زەحمەت من هەبوو، لێ هیڤی و ئومێد و گەشبینی ژی د سترانێن من دا هەنە، د نوکە ژی دا ئەز مژوولی تۆمارکرنا سترانەکێ مە کو ل دەمەکێ نێزیك ب شێوێ ڤیدیۆ کلیپ دێ هێتە بەلاڤکرن».
