ب گیانێ براینیێ جەماوەرێ وەرزشی چاڤ ل دێربیەكێ جودایە
جەماوەرێ وەرزشی ل پارێزگەها دهۆكێ ب گشتی چاڤەڕێ دێربییا بەهدینان ئەوا بڕیارە ل شەمبییا بهێت ل دەمژمێر حەفت شەڤ تیما تەپا پێی یا یانەیا دهۆك مێڤاندارییا تیما یانەیا زاخۆ بكەت ژ چارچووڤێ هەڤڕكیێن گەڕا سێیێ ژ خولا ستێرێن ئیراقێ یا پیشەكاران.
تیما زاخۆ ئەوا بۆ وەرزێ نوو ب شێوەكێ جودان هاتینە دناڤ خولێ دا ب سەرپەرشتییا راهێنەرێ قەتەری تەلال ئەلبلوشی و ئینانا شەش یاریزانێن پیشەكار و ستێرێ هەلبژارتیێ ئیراقێ ئەمجەد عتوان، هەرچەندە د یارییا ئێكێ دا دەستپێكەكا باش نە ئینا پشتی دگەل جەوییە تووشی خوسارەتیێ بوو لێ دووڤدا گوهۆڕینێن باش پەیداكرن و بۆ ڤێ یاریێ گەشبینن بهێز ڤەگەڕێنە د خولێ دا و بزاڤێن دەستڤە ئینانا دێربیێ بكەن.
ژلایێ خوەڤە تیما یانەیا دهۆك دەستپێكا وێ یا بهێز هاتیە دناڤ هەڤڕكییان دا و شیایە دو سەركەفتنا ل دووڤ ئێك ل سەر شورتە و نەورۆز ب سەرپەرشتییا راهێنەرێ كوڕێ باژێرێ دهۆكێ سلێمان رەمەزان دەستڤە بینن، یارییا ئەڤرۆ دهێتە هژمارتن ئاگرین و بهێز ژبەركو ب دێربیێ بەهدینان و پارێزگەهێ دهێتە بناڤكرن، یاریزانێن وان ژی ب هیڤی نە بۆ سەركەفتنێ.
بۆ زانین ل دووڤ ئامارێن یاریێن دناڤبەرا هەردو تیماندا 20 جاران بەرانبەری ئێك بووینە، رێژەیا مەزن یا وەكهەڤییان بوویە كو 13 جاران، پێنچ سەركەفتن بۆ دهۆكێ و دو بۆ زاخۆ بووینە، دهۆكێ 19 گۆل تۆماركرینە ژلایێ خوە زاخۆ 13 گۆل بووینە.
