ب گەنجێن باژێرێ خوە یانەیا پیرس هەڤڕكییا پلێتا دەربازبوونێ دكەت
شاهۆ فەرید:
د داخویانیەكێ دا د. بەهزاد سالح سەرۆكێ یانەیا پیرس بۆ رۆژنامەیا ئەڤرۆ دیار كر تیما وانا یا فوتبۆلێ هەموو بەرهەڤیێن خوە كرینە، ئەو دێ تیمەكا هەری باش ژ لاوان پشكداریێ د خولا پلە سێ یا ئیراقێ دا كەن، مەرەم ژ پشكداریێ ئەوە یاریزان بخوە مفایی ژێ بینن و ئاستێ دورست نیشانبدەن.
زێدەتر ناڤهاتی گۆت: یارییا مە یا ئێكێ یا هاتییە دەستنیشانكرن ل 22ێ ڤێ مەهێ دگەل یانەیا ئاكرێ ل یاریگەها یانەیا دهۆك، ئەم دێ هەموو بزاڤان كەین ببنە هەڤڕك بۆ پلێتا دەربازبوونێ سەرباری تیما مە یا گەنجە و هەموو خەلكێ باژێرێ دهۆكێ نە، هەروەسان ئەڤ یاریزانە ژی ماوەیەكێ درێژە ل گەل یانەیێ و مە پشتبەست دانا سەر وان و هیچ یاریزانەكێ دەرەكی و پیشەكار مە بۆ رێزیێن تیمێ نە ئینان، سەربورەكا باش یاریزانان هەیە د خولێن تازەپێگەهشتی و لاوان دا، ئەم وەكۆ یانەیا پیرس بەردەوامیین بێ راوەستیان كاردكەین.
سەرۆكێ یانەیا پیرس گۆت ژی: ژیێن یاریزانا بچووكن لێ ئاستێ وانا هەرێ بلندە و پێشكەفتینە، ئەڤ تیمە سەرپەرشتێ گشتی كاپتن هەرژەنگ بابەكر زێباریە و سەرپەرشتێ تیمێ ئازاد ئەحمەدە، دەستەكا ڕاهێنەران پێكهاتیە ژ كاپتن نێچیرڤان شوكری و هاریكارێ وی وەلات، ئەم هیڤی نە دێ ئاست و ئەنجامێن باش دەستڤە ئینین و دەربازی خولا پلە دو یا ئیراقێ بین.
بۆ زانین دووماهی پشكدارییا یانەیا پیرس د خولا پلا نایابا ئیراقێ دا ل وەرزێ 2007-2008ێ بوو ئەوا ب پشكدارییا 25 یانەیان بوو و هاتبوونە بەلاڤكرن ل سەر دو كۆما، كۆما ئێكێ 14 یانەیان بوو، پیرس د وێ كۆمێ دا بوو، ب 37 خالان ڕێزا پێنجێ هاتبوو و دهۆك ب 61 خالان رێزا دویێ بوو.
