ب یاریێن ئاگرین كۆپا كوردستانێ دێ ڤەگەڕیت
قەیس وەیس:
بڕیارە ل حەفتییا بهێت هەڤڕكیێن قۆناغا دویێ یا كۆپا كوردستانێ یا تەپا پێی ب ئەنجامدانا هەشت یارییان، یانەیێن دهۆك و ئاكرێ دێ بەرانبەری یانەیێن باژێرێ هەولێر و سلێمانیێ بن و زاخۆ دێ یا چاڤەڕێ بیت.
ل دووڤ پشككێشانا قۆناغا دویێ یا كۆپا كوردستانێ ئەوا دێ ل20 و 21ێ ڤێ مەهێ هێنە كرن، تیما یانەیا دهۆك ل یاریگەها خوە مێڤاندارییا یانەیا ئارارات كەت، ژلایێ خوەڤە ئاكرێ ل باژێرێ سلێمانیێ بیتە مێڤانا یانەیا شێروانە، یانەیا زاخۆ د ڤێ قۆناغێ دا دگەل یانەیا پێشمەرگەیا هەولێر دێ چاڤەڕێ بن.
ژ یاریێن كۆپا بڤی رەنگی نە، هەولێر- برایەتی، قەلادۆز- رانیە، دەربەندیخان- سەید سادق، سیرۆانی نوو- سۆران، هندرین- شەقلاوە، چوارقۆرنە- سەنگەر.
ژلایەكێ دووڤە فیدراسیۆنا تەپا پێی یا كوردستانێ بڕیاردا خولا لاوان بۆ دەستپێكا نیسانا ئەڤ سالە بهێتە پاشئێخستن ژبەر كاودانێن دارایی یێن پرانییا یانەیان و پشكداریێن تیمێن وان د خولا نایابا كوردستانێ و ئێك دا، هەروەسان بڕیار دا هەمی ئەو كارتێن زەر و سۆر یێن یاریزانێن تیمێن پشكدار د خولێن پلا نایاب و ئێك دا بهێنە راكرن بتنێ سزایێن كارگێری دێ مینن، دیسان بڕیار داخواز ژ یانەیێن پلا دو هاتیە كرن هەتا 22ێ ڤێ هەیڤێ لیستا ناڤێن تیما خوە ب شێوەیی كشوفات بۆ بهێتە فرێكرن.
