تابلۆیا كۆگه‌هێ
كورته چیرۆك
به‌هزاد به‌هرام
د وێ خوله‌كێ دا ئه‌ز مژولی شووشتنا ده‌ستێن خوه بووم ، تو بێ سلاڤ و بێ پرسیار وه‌ها بێ منه‌تی ژ ده‌رگه‌هێ پرسگه‌هێ بۆری و كه‌سێ ئه‌و دل و شیان و هێز نه‌بوون ته رابگریت و داخوازا دیاركرنا كاری ژته بكه‌ت، هه‌تا سیتافكا ته وێنه بكه‌ت ، تو گه‌هشتی بنێ قادرمان و ئێدی دێ هێدی هێدی قادرمه قادرمه سه‌ركه‌ڤی و به‌ره‌ڤ سه‌ری و قاتان ڤه چی، ژ نشكه‌كی ڤه ئه‌ز ژ شووشتنا ده‌ستان خلاس بووم هه‌ر ژ زڤرینا من بۆ ئالیێ قادرمان من چ… دیت !؟ من دیت پێلاڤه‌كا سۆرا چم بلند گۆزه‌كێن سپی و كه‌ژ، ده‌نگێ چه‌قه‌چه‌قا پێلاڤ و خرخالان تێكدا بوونه ئاوازه‌ك به‌ره‌ڤ خوه ڤه راكێشام، راكێشام ب دویڤ وان گۆزه‌كان كه‌فتم ، ب له‌ز ب له‌ز نێزیكتر بووم باقێن سۆر و سپی و به‌له‌ك و نازك ئه‌ز هێشتا راكێشام هه‌تا ته‌نورێ ره‌ش ل سه‌ر چوكان خویا بووی، هێشتا ب له‌زتر كه‌فتم دویڤ پێنگاڤێن ته هه‌تا من رانێن تژی گوشت و كماخێن بلند نه بچووك و نه مه‌زن بێژه ناڤنجی دیتن، پشتا ته چه‌ندا… ! پان و كێشایێ ولاكێشه‌یه من هزر كر ته‌ختێ نڤستنێ یه..! داڤێن پرچا ته‌یا تاری و ره‌ش دگه‌ل هه‌ر پێنگاڤه‌كێ بلند و نزم دبوون دابێژی سیپه‌لێن گولێن ده‌خلینه. ب ڤی ره‌نگی ته ئه‌ز كێشامه قاتێ سیێ من هزر كر ئه‌ز ژ گۆزه‌كێن ته هه‌تا پرچا سه‌رێ ته ژێهه‌ل ڤێراچوومه نه‌ك ل قادرمان و قات ب قات سه‌ركه‌فتمه. به‌ری تو بو ره‌خێ چه‌پێ بچی ئه‌ز بهنشیم ، دگه‌ل ده‌نگێ بهنشینا من تو زڤری و ئه‌ز دچاڤێن ته‌دا غه‌واره‌بووم ، به‌رزه‌بووم جارنا من خوه دیت دچاڤێن ته‌دا ئه‌زێ مه‌له‌ڤانیان دكه‌م چ ده‌ریایه‌كا كویره، چ شه‌پوولن چ زڤرۆكن..! ئه‌م ماین بێده‌نگ، پاشان ئه‌ز بو ره‌خێ راستێ چووم، ڤێ جارێ تو كه‌تی ل دویڤ من ژڤێ ناڤسالۆنێ بۆ یا دی، ژڤی دنگێ سه‌بێ بو دنگێ دی تو هه‌ر هاتی بێ راوه‌ستان بێ پرسیاركرن بێ سوحبه‌تكرن و ئاخفتن، ئه‌ز گه‌هشتم به‌ر ده‌رگه‌هێ ژۆره‌كێ ل هنداڤی ده‌رگه‌هێ ژۆرێ تابلۆیه‌ك لێدابوو ل سه‌ر تابلۆی نڤیسابوو {كۆگه‌ها ژماره ئێك ( 1 ) } ژ چركێنا ڤه‌كرنا قفلا ده‌رگه‌هی من هه‌ست پێكر تو راوه‌ستیای ته چمێ پێلاڤا خوه‌یا ره‌نگ سۆر راكر و ل ئه‌ردی دا ژ ده‌نگێ پێلاڤا ته ئه‌ز زڤریم، ڤێ جارێ من چ دیت..! ژ چاڤان ده‌رباز بووم گه‌هشتم لێڤان وه‌ها دسۆر بوون مینا پێلاڤا چم زراڤ و بلند، ته ددانێن خوه ل سه‌ر لێڤا بنی گڤاشتن ته ب خوه لێڤا خوه گه‌ز كر، من چاڤێن خوه ئینانه ئاستێ سنگێ ته، سه‌رێ پشكۆژێن ته دناڤ تیشیرتێ ته‌یێ ره‌نگ سپی دیار و بلند بوون، ناڤته‌نگه‌كا زراڤ زراڤ… تو ڤێ گه‌رم و ته‌حرێ هاتی یه چ ؟ تو ڤێ دره‌نگیا نیڤروژێ هاتی یه چ ؟ تو ڤێ ئێڤارییا زوو هاتی یه چ ؟ تو هاتی ب ماچه‌كێ گرێبه‌سته‌كێ مۆر و ئێمزا بكه‌ی…!؟
