تابووتا بامه‌رنی، زه‌نگله‌ك د تابووتا جڤاكه‌كێ مری دا.. خواندنه‌ك بۆ كۆمه چیرۆكا تابووت یا (عبدالرحمن بامه‌رنی)
دلدار محه‌مه‌د
رۆژه‌كێ، من ده‌مه‌كێ ڤالا هه‌بوو، ما دێ بوچی وه‌كی وان نڤیسه‌ران كه‌م ئه‌وێن خوه ب كه‌سێن نموونه و بلند نیشان دده‌ن، هه‌ما راستی من ژی هاتن و چوون دناڤ تۆرێن جڤاكی دا دكر، ژ نیشكان ڤه په‌رتووكه‌ك ب به‌رچاڤێن من كه‌فت، كۆمه‌كا كورته چیرۆكان بوو ب ناڤێ( تابووت) ژ نڤێسینا عبدالرحمن بامه‌رنی. هه‌ر ژ ئێكه‌م دیتن بۆ من پرسیار چێ بوو، بۆچی تابووت؟ بۆچی ئه‌ڤ هه‌می ناڤێن ئه‌ده‌بی هه‌ین، بامه‌رنی ڤیا ڤێ كۆما قه‌شه‌نگ ب ناڤێ تابووتێ بناڤ بكه‌ت؟! ژڤێ كورته چیرۆكێ بۆ یادی و هه‌تا گه‌له‌ك ده‌مژمێر من دگه‌ل ڤێ په‌رتووكا ب ناڤێ تابووت ده‌رباس كرین، ده‌مه‌كی گه‌هشتمه وێ كورته چیرۆكا ب ناڤێ (تابووت) یا په‌رتووك پێ هاتیه ناڤكرنێ، ئه‌ڤ تابووته كه‌ڤاله‌ك بوو پر ژ برینێن جڤاكی، مرۆڤی هه‌ست دكر چیرۆكنڤێسی دڤیا بێژیت: ئه‌م زیندیێن مرینه، یا مه به‌س خوارن و ڤه‌خوارنه و بێ هه‌ست و لڤین و هه‌لویست، ده‌مێ گۆتی (ئه‌ڤه زێده‌تره ژ چوار ده‌مژمێران ئه‌ز دناڤ ڤێ تابووتێ دا درێژكری، دچوار ده‌مژمێران دا هه‌می رۆژێن ته‌مه‌نێ من وه‌ك شه‌ریته‌كا سینه‌مایی دكه‌ڤنه به‌رچاڤێن من و ده‌رباز دبن، شه‌ریته‌كا سینه‌مایی یا ژ هه‌ستا ساڕ).
مرۆڤ هه‌ست دكه‌ت بامه‌رنی دڤێت بێژیت: ژیانا مه هه‌می كورته چیرۆكه‌كا پری مرن و بێ هه‌سته، ئه‌م ژ هه‌می رابردوویێ خوه په‌شیمان و دلسار و نه دلخوه‌شین، له‌وما ژی ره‌ڤێ به‌ره‌ڤ تابووتێ د هه‌لبژێرین، تابووته‌ك ب هه‌ناسه و زیندیه‌ك ب ته‌رزێ مریان!
په‌یڤێن ڤێ چیرۆكێ هێشتا ئه‌ز دگه‌ل پێلا خوه برم، پرسیاره‌كێ خوه هه‌لاڤێت، ئه‌ڤه چ هێزه، ده‌ستێ كێ ل پشته مه د مرینیت و ژیانێ ژ هه‌ژی مه نابینیت، هه‌تا پێنڤیسێن نڤیسه‌ران كورته چیرۆكان ب ناڤێ تابووتان بۆمه ب ئافرینن؟ نه‌فره‌ت ل هه‌می هێزێن زال، یێن ئه‌م نه‌هێلاین ئه‌م.
پاشی ئه‌ز ب ڤه‌چنقین ڤه ژ گۆتنا خوه لێڤه بووم، هه‌كو من د رێزكه‌كێ دا دیتی، (ئه‌ڤه دوماهی بریارا منه، ئه‌ز هه‌ستێن ساڕ و چاڤێن گه‌مار و گرتی و كه‌نیێ ژ قه‌ستا ل پاش خوه بهێلم). پاشی من گۆته خوه عه‌جێب نه‌مینه پێنڤیسه‌ك ڤێ بریارێ ب هه‌می هشیاری بده‌ت، ما جڤاكێ پری هه‌ستێن به‌ستی گرتی و چاڤێن هه‌ما به‌س ره‌نگ چاڤ و چ تشتان نه‌بینن و لێڤێن دوور ژ گرنژینان ژ هه‌ژی چنه تابووت و ره‌ڤین به‌ره‌ڤ مراندنێ تێنه‌بیت! ما مرۆڤێ نه هشیار و دوور ژ هه‌ر هه‌سته‌كی مرۆڤه، ما هه‌ر ئێكێ د خۆت و ڤه‌دخۆت مرۆڤه؟ من دیت بامه‌رنییێ نڤیسه‌ر دڤیا بێژیت ئێدی ده‌مه ژ ڤێ تابووتێ بده‌ركه‌ڤن، بۆ ده‌ركه‌فتنێ هوشیاربوونێ و رابوونه سه‌ر پیا ئێڤار ژی بیت، نه دره‌نگه!
هه‌كو ئه‌ز دناڤ ڤێ كورته چیرۆكێ دا دچووم، پتر نیشانێن پرسیارێ خوه د هه‌لاڤێتن، ب تایبه‌تی هه‌كو دگۆت (چار ده‌مژمێران دناڤ ڤێ تابووتێ دا هێشتا تشته‌ك نه‌شیایه هزرێن من ب گوهۆڕیت!). راستی ژی سه‌یره ژیان بگه‌هیت ئاسته‌كی مرۆڤ ژ چاڤێن گه‌مار بره‌ڤیت و په‌نایێ ببه‌ته به‌ر تابووتێ! كو ب دیتنامن ئه‌ڤ هه‌ست و بریاره دوماهیك ئاستێ بێ ئومێدبوونێ یه هێشتا ڤان هه‌می ئێشان و هه‌ستا، ڤان هه‌موو تابووت و كه‌له‌خان نه‌شیایه هزرێن مه ب ئاڤا گوهۆڕینێ فرشك بكه‌ن، ئه‌ز وه‌سا تێگه‌هشتم نڤیسه‌ری دڤێت بێژیت راسته ژیانێ گه‌له‌ك گڤاشتن هه‌نه، به‌لێ ئه‌م یێن (تاك ـ جڤاك) قوربانیێن هزرێن خوینه، چه‌ند بارانێن گوهورینێ ببارن، چه‌ند ئه‌م بۆ ته‌نابوونێ ژڤان ئێشانا هه‌میا په‌نایێ بۆ تابووتان ببه‌ین یا بێ رامان و بێ به‌رهه‌مه، ئه‌و قه‌یدا هزرێن مه‌یه رێك نه‌دایی پێشڤه بچین، هندی ئه‌م ژ گه‌مارا هزرێن خوه قورتال نه‌بین، گوهارتنێن ئه‌م دكه‌ین ئه‌گه‌ر مه روحا گوهۆڕینێ ژی ڤه‌گه‌رانده جه‌سته‌یێن خوه یێن مری هه‌ر بێ مفایه، چونكی هزرێن مه‌نه بۆ تابووتان مالبچویكن هه‌تا ژ تابووته‌كا پری بزمار ده‌ردكه‌ڤین به‌ره‌ڤ ئێكا دیترڤه دچین، ئه‌م د مرینه به‌لێ هه‌ناسه دده‌ین و عه‌شقا مه دگه‌ل تابووتان عه‌شقه‌كا دێرینه د هه‌می سات و چركه‌یان دا بوومه دبیته په‌ناگه‌هـ.
من تابووت دیت زه‌نگله‌كا هشیاركرنێ، به‌لێ ئه‌رێ نڤیسه‌ره‌ك دێ شێت هشیاركرنێ دجڤاكه‌كی دا بكه‌ت دناڤبه‌را تاكێن وی و خوانده‌ڤایێ دا، دیوارێن ب قه‌ده‌ر درێژیا دیوارێ چینێ هه‌بن! جڤاكه‌ك دێ شێت ب كورته چیرۆكه‌كێ ژ تابووتێ ده‌ربكه‌ڤیت، كو هه‌تا نوكه دناڤ وی جڤاكی دا كتێب بێ بهاترین تشت بیت، ئاهه‌نگێن ئیمزاكرنێ یێن كتێبان ب هه‌روه نه‌بن ژ كه‌فتنا تایێ شه‌رمێ نه‌بیت كه‌س ناكریت.
یا ژمن ڤه تابووتا بامه‌رنی یا جوان و كارتێكه‌ربوو، به‌لێ نه بوو تاكێن جڤاكه‌كی كو ژ مێژه گۆڕێ خوه ب ده‌ستداهێلانێ كولایی و بۆ به‌رژه‌وه‌ندێ نووكرن كریه د هزار تابووتان دا، ژمێژه‌یه هه‌می دبێژنه‌مه خودێ ژێ رازی بیت، به‌لێ ما تو بێژی خودێ ژ ده‌ستداهێلایی و بێده‌نگ و هه‌لویستان رازی ببیت؟!
