تارق سه‌عید ئه‌ركێ راهێنه‌راتیا هه‌لبژارتیێ ئیراقێ وه‌رگرت
ئه‌ڤرۆ،
د داخویانیه‌كێدا راهێنه‌رێ تیما یانا دهۆك بۆ یاریا پایسكلان دیاركر كو ئه‌و ژلایێ ئێكه‌تیا ئیراقێ هاتیه ده‌ست نیشانكرن ژبۆ ئه‌ركێ راهێنه‌راتیا هه‌لبژارتیێ وان سه‌ر ئاستێ تازه‌پێگه‌هشتیان خوه به‌رهه‌ڤكرن بۆ قاره‌مانیا عه‌ره‌بی ئه‌وا دهێته چاڤه‌ڕێكرن هه‌ڤركیێن وێ ل دووماهیا چڕیا ئێكێ یا بهێت وه‌لاتێ مسرێ مێڤانداریا وێ بكه‌ت.
زێده‌تر تارق سه‌عید بۆ رۆژناما ئه‌ڤرۆ گوت: هه‌رچه‌نده به‌ری نوكه راهێنه‌رێ هه‌لبژارتیێ لاوێن ئیراقێ بووم لێ ژبه‌ركو ئاستێ تازه‌پێگه‌هشتیان پێدڤی ب زێده‌تر گرنگیێ و شاره‌زاهیێ یه و باوه‌ریا ئێكه‌تیا ئیراقێ ب شیانێن من ئه‌ز راسپاردیمه بۆ بڕێڤه‌برنا تیما تازه‌پێگه‌هشتیان ئه‌وا نوكه د كه‌مپه‌كێ راهێنانێ دا ل هه‌ولێرا پایته‌خت بۆ باشترین به‌رهه‌ڤیا به‌ری ب كه‌ڤنه د هه‌ڤڕكیێن قاره‌مانیا عه‌ره‌بی دا ئه‌وا دێ ل 28ێ چڕیا ئێكا یا بهێت ل قاهره پایته‌ختێ مسرێ بهێته كرن.
هه‌روه‌سا ناڤهاتی ئه‌وچه‌نده دیاركر كو 15 یاریزان ژ هه‌موو ئیراقێ هاتینه ده‌ستنیشانكرن پشتی ل هه‌ردو قۆناغێن ئێكێ و دویێ یا قاره‌مانیا ئیراقێ رێزێن پێشێیێ بۆ به‌ریكانێن جودا ب ده‌ستڤه‌ئیناین و گوت: ژوان هه‌ژمارا یاریزانان سێ ژ یانا هه‌ولێرێ و دو یێن رانیا پشكدارن و سه‌رجه‌مێ گشتی پشتی كه‌مپێ راهێنانێ شه‌ش یاریزان هێنه ژێگرتن بۆ قاره‌مانیا عه‌ره‌بی.
ژلایه‌كێ دیڤه تارق سه‌عیدی دیاركر كو دبیت بۆ قۆناغا دویێ یا كه‌مپێ راهێنانێ ل پارێزگه‌ها دهۆكێ بهێته كرن و ئه‌ڤچه‌نده دێ د به‌رژوه‌ندیا سێ یاریزانێن یانا دهۆكێ دابن ئه‌وێن نوكه ل گه‌ل هه‌لبژارتیێ لاوێن ئیراقێ دا كو ده‌لیڤه مانا خوه د ناڤ پێكهاتیێ لاوان دا زێده‌تر لێكه‌ن و گوت: ب هیڤی ئه‌م بشێن وه‌كو نوونه‌رێن پارێزگه‌هێ باشترین ئه‌نجام ب ده‌ستخوه ڤه‌بینن
