تارق سەعید: ناسناڤێ قۆناغا ئێكێ بەرەلایی نەبوویە
ئەڤرۆ
پایسكلڤانێن یانەیا دهۆك ل سەر ئاستێ تازەپێگەهشتیان بۆ بەریكانەیا گشت تیمان یا درێژاهیا 16كم شیان رێزا ئێكێ بهێت و ناسناڤێ قۆناغا ئێكێ ب دستخوەڤە بینن بۆ ماوەیێ دەمژمێرەك، نەه خولەك و 33چركە تۆماركرین، ب ئێك خولەك ژ هەڤڕكا خوە دیفاع ئەلمەدەنی دووركەڤن، د هەڤڕكیێن واندا ئەوا ب پشكداریا 11 یانەیان ل پایتەختێ ئیراقێ بەغدا هاتینە كرن.
ل سەر ئاستێ هەڤڕكیێن تاك یاریزانێن دهۆكێ رێزێن سێیێ هەتا شەشێ كۆنترل كرن پێكهاتی بوون ژ ئاریوس سلێمان، یوسف بەرەڤان، محەمەد سادق و یوسف جیهان و هەڤالێ وان ئیبراهیم سەلیم رێزا دەهێ هات، ئەوا 53 یاریزانێن یانەیێن پشكدار بووین.
ل دۆر ڤێ ناسناڤی تارق سەعید راهێنەرێ تیما دهۆكێ بۆ رۆژناما ئەڤرۆ گۆت: خوەش بەختانە ئەم شیاین قۆناغا ئێكێ ب سەركەفتیانە دەربازبكەن و ناسناڤ بۆ تیما مە بمینت، سەرباری پرانیا یاریزانێن مە بوو جارا ئێكێ یە پشكدار دبن، لێ ئەو ماندیبوونا رۆژانە بەری قارەمانیێ د ماوێ زێدەتر هەیڤەكێ دا یا بەرهەم بوو، دەستڤە ئینانا ناسناڤێ قۆناغا ئێكێ بەرەلایێ نەبوو بەلكو ڤەرێژا ئەوێ راهێنان و زاخا بلند یا یاریزانان و پشتەڤانیا كارگێریا یانێ بوویە.
ژلایەكێ دووڤە ناڤهاتی دیاركر قۆناغا دویێ دێ ل 23ێ ئادارا بهێت باژێرێ بەسرا مێڤانداریا وێ كەت، ئەڤ دەمە یێ گۆنجایی نینە، لەوەما مە و چەند یانەیان داخوازا گوهۆڕینێ یان پاشئێخستنا قارەمانیێ بۆ دەمەكێ دی كریە، لێ هەكە چو بڕیار نە هاتنە دان ئەم نەچارین پشكداریێ بكەین ژبەركو چەند یاریزانێن مە دناڤ هەلبژارتیێ ئیراقێ دا دێ هێنە دیتن و هەروەسان دێ كارتیكرنێ ل سەر یاریا پایسكلان ل پارێزگەهێ ب گشتی و یانەیا دهۆكێ كەت، گەشبینم بۆ هەرسێ قۆناغێن بهێت دگەل پشتەڤانیا بەردەوام یا كارگێریا یانێ دێ سەرێ لیستێ پارێزین و ناسناڤی دەستخوەڤە ئینن.
