تاكێ كورد و بهرپرسایهتى
رهمهزان نهسرهدین كێڤلى
تاك بنهمایێ ئاڤاكرنا جڤاكهكێ ساخلهم و كارا و بهرههمهێنهره، ژبهركو تاك دبیته خێزان و شهنگستێ نهتهوهیى ل سهر تاكى دهێته ئاڤكرن، پشتى كو وهلاتێن ئهورۆپى د چهندین قووناغ و شهرێن دژوار دا دهربازبووین گههشتینه ئهنجامهكى و مرۆڤ وهكو تاك نهكرینه سهنتهر بۆ خزمهتێن خوه، بهلكو (ئابوور و سیاسهت و ههموو زانست) خستینه د خزمهتا تاكى دا بۆ هندێ ئایندێ وان یێ بهێز بیت، ئهورۆپا نهشیا سهر بكهڤیت، لهورا پشتى تاك بوویه سهنتهرێ بهرژهوهندیا ئێدى قووناغا گهشهیا هزرى و سیاسى و ئابوورى ل ئهورۆپا سهرهلدا.
گومان تێدا نینه كوردان وهكو مللهت ژى چهندین قووناغ دهربازكرینه چ ئهو قووناغ د سروشتى بن یانژى قووناغێن نه سروشتى وهكو شهر و كوشتن و كێمابارانكرن و ئهنفالكرن و ..هتد. گرنگترین قووناغا سیاسی بر (مللهتێ كورد) ل سهدهیا بوورى پشتى سهرهلدانا پیرۆز قووناغهكا نوو كهفتیه پێش مللهتێ كورد ب گشتى، خالا مه دڤێت ئاماژێ پێ بدهین بابهتێ بهرپرسایهتیێ یه كو ئهڤ سالوخهته گرێدایى هوشمهندى و ئیدراكا ههر تاكهكى یه ههموو وان رهفتار و كریار و ئاخفتنا ب خوهڤه دگریت ئهوێن ئهنجام ژێ دروست دبن چ ئهنجامێن وێ خراب بن یان باش مرۆڤ وهكو تاك بهرپرسیاره بهرامبهرى وان رهفتار و كریارێن ئهنجامدایین چ ئهڤ بهرپرسیاریه تاكهكهسى بیت یانژى بهرامبهرى جڤاك و كومهلگههێ بیت، بنهمایێ بهرپرسایهتیێ بۆ تاكێ كورد پێویست دكهت كو چاڤدێركریا خوه بكهت پاشان چاڤدێریا كهسێ بهرامبهرى خوه بكهت و جڤاكى پشتگوهـ نههاڤێژیت، دیسا بزانیت وهزیفهتا وى ل ناڤ جڤاكى چیه و چ ژێ دهێته خواستن..
تاكێ بهرههمهێنهر ئهوه دهمێ ههست دكهت كو بهرپرسه و كهسێ بهرامبهرى وى زانست یێ ل دهف ههى و نابیت ئهڤ زانست و شیانه د زاتێ وی دا بمینیت، بهلكو دهربازى یێ بهرامبهرى خوه بكهت بۆ هندێ ههموو كهس مفاداربن و ههردهما مه ههست ب ئهڤێ خالێ كر وى دهمى ئایندێ مه دێ یێ گهش بیت، بهلێ ئهگهر ئهم بهراوردیا جڤاكێ كوردى بكهین د بازنێ تاكى و گرێدانا وى ب ئهڤێ خالێ ڤه دێ بۆ مه دیاربیت كو ب راستى مه لاوازیهكا بهرچاڤ ههیه و پتریا مه ژبلى خوه ئاگههـ ژ كهسێ بهرامبهرى خوه نینه و گهلهك جاران دیاردهیێن گهلهك خراب د ناڤ جڤاكى دا پهیدا دبن، چونكو كاریگهریێ ل سهر كهسایهتیا مرۆڤى ناكهن، لهورا ئهم بێ دهنگ دبین بهلكو كاریگهریا وێ ل سهر جڤاكى زۆر یا مهترسیداره بهلێ ئهم د بازنێ بهرژهوهندیا تاكى دا تهماشه دكهین، لهورا مه نهشیایه د ئهڤێ خالێ دا سهركهفتى بن.
شهنگستهكێ گرنگتر ههیه بۆ ههلگرتنا بهرپرسایهتیێ ل دهف تاكى بابهتێ رێنما و راوێشكاریێ و گۆتنێن جوان و نهسیحهتێ یه بۆ خهلكێ بهرامبهر، دیاره شرۆڤهیا ئهڤێ خالێ بۆ تاكى د وێ چهندێ دا دیار دبیت كو پتریا مه دئاخڤین و ئاخفتنێن مه دبیت گهلهك جوان و بریقهداربن، بهلێ د ناڤهرۆكا خوهدا ئهم پێگریێ ب وان ئاخفتن و رێنما و شیرهتان ناكهین، چ ئهم رهوشهنبیر بین یان مامۆستا و زانایێن ئایینى یان بهرپرسێن حزبى و سیاسى بین، خالهك گهلهك بهربهلاڤ بوویه، ئهوژى ئهوه (تو گوهێ خوه بدهیه گۆتنێن من و ب كریارێن من نهكهى) ئهڤه بخوه گومانێ ل دهف كهسێ بهرامبهر دروست دكهت كو گۆتنێن مه كاریگهریا خوه ل سهر وى و جڤاكى نهبن، لهورا ژى زۆرینا مه بووینه بانگخوازێن بێ كریار.
ل دووماهیێ ب دیتنا من گرنگیا ئهڤى بابهتى د هندێ دایه كو ئهم ل سهر خوه زال بین وهكو گۆتن و كریار نهخاسمه ل دهمێ دانا بریارێ د ناڤ جڤاكى دا بۆ هندێ ئهم پهشێمان نهبین و گرنگیا دى ئهوه ئهم رێزێ ل زاتێ خوه بگرین وهكو مرۆڤ و پاشى ل ههموو كهسهكى بگرین حهتاكو ئهوژى ههست ب بهرپرسایهتیا خوه بكهن و جڤاكێ مه بهر ب گوهۆرینێن باشترڤه بچیت ب تایبهت د بازنێ ههست كرن ب بهرپرسایهتیێ دا و ل ڤێره رۆلێ حوكمهتێ گهلهك گرنگه ل گهل ههموو دامودهزگههێن پهروهردهریى و زانستى كاربكهن بۆ ئاڤاكرنا جڤاكهكێ ساخلهم.
