تاليبان داخوازيا حوكمه‌تێ ره‌تكر و ژ شه‌ش لايان ڤه هێرش كره سه‌ر له‌شكرى
ئه‌ڤرۆ نيوز، فاتما مزوورى:
پشتی كو ته‌ڤگه‌را تالیبان ل ئه‌فغانستان پێشنیارا حكومه‌تێ ره‌ت كر، چه‌كدارێن وێ ته‌ڤگه‌رێ ژ شه‌ش ئالییان ڤه ئێریشی چه‌ند خالێن پشكنینێ یێن پۆلیسێ ئه‌فغانستان ل ناڤچه‌یا ئۆب كامار ل هه‌رێما بادگیس كرن، د ئه‌نجامێ ده كه‌سه‌ك هات كوشتن و چار ژی برینداربوون.
پشتی كو د ئێریشه‌كی ده سه‌ر دوو خالێن پشكنینێ یێن پۆلیس ل هه‌مان ناڤچه‌یێ به‌ری نها سێ سه‌ربازێن ئه‌فغانی هاتبوون كوشتن، ئه‌ڤ ژی دووه‌مین جاره ل وێ ناڤچه‌یی ئیریش ل سه‌ر خالێن پشكنینێ یێن پۆلیس پێكتێ.
ده‌ربارێ ڤێ یه‌كێ ژه‌نه‌رال ئه‌حمه‌د فه‌هیم قایم سه‌رۆكێ پۆلیسێ بادگیس راگه‌هاند كو چه‌كدارێن تالیبان ژ شه‌ش ئالییان ڤه ئێریش كرنه سه‌ر خالێن پشكنینێ ل ناڤچه‌یێ.
ته‌ڤگه‌را تالیبان ده‌ما جه‌ژنا ره‌مه‌زانێ پابه‌ندێ ئاگربه‌ستێ بوو، لێ پێشنیارا حكومه‌تێ ژبۆ درێژكرنا ده‌ما ئاگربه‌ستێ ره‌ت كر.
