تالیبان شیعێن ئه‌فغانستانێ ژ وی وه‌لاتی ده‌ردخینیت
ئه‌ڤرۆ:
چه‌ندین چالاكڤانێن ئه‌فغانی بۆ BBC دیار كرن كو چه‌ند رۆژن چه‌كدارێن تالیبانێ ل چه‌ندین ده‌ڤه‌رێن ئه‌فغانستانێ داخواز ژ شیعێن وی وه‌لاتی كرینه كو دڤێت هه‌تا سێ رۆژێن دی مالێن خوه چۆل بكه‌ن و ژ ئه‌فغانستانێ ده‌ركه‌ڤن، ب هزاران وه‌لاتیێن شیعه یێن ئه‌فغانی د ماوه‌یێ چه‌ند رۆژێن بۆری دا به‌رێ خوه داینه ئیرانێ و نها ره‌وشا شیعان ل ئه‌فغانستانێ گه‌له‌ك خرابه.
سه‌عید خه‌تیب زاده په‌یڤدارێ وه‌زاره‌تا ده‌رڤه یا ئیرانێ ژی دوهی راگه‌هاند كو ئه‌و ب باشی دووڤچوونا ڤی بابه‌تی دكه‌ن و هه‌كه تشته‌ك وه‌سا هه‌بیت ئیران دێ ب توندی به‌رسڤا تالیبانێ ده‌ت، چونكو دڤێت تالیبان رێزێ ل هه‌موو وه‌لاتیێن ئه‌فغانستانێ بگریت و شیعێن كو ل ئه‌فغانستانێ ژی دژین وه‌لاتیێن وی وه‌لاتی نه و تالیبانێ ئه‌و مافه نینه وان ژ ئه‌فغانستانێ ده‌رخینیت.
په‌یڤدارێ وه‌زاره‌تا ده‌رڤه یا ئیرانێ ئه‌و یه‌ك ژی دیار كر كو تالیبانێ به‌رێ نها سۆز دایه جڤاكێ نێڤده‌وله‌تی كو ئه‌و دێ بێی جوداهی خزمه‌تا هه‌موو وه‌لاتیێن ئه‌فغانستانێ كه‌ن و نها ژی یا تالیبان دكه‌ت ب چو ره‌نگه‌كێ ناهێته قه‌بوول كرن و هه‌كه تشته‌ك وه‌سا ب به‌لگه بهێته سه‌لماندن دڤێت جڤاكێ نێڤده‌وله‌تی ژی ل هه‌مبه‌ر بنپێكرنێن رێكخراوا تالیبانێ بێده‌نگ نه‌مینیت.
ل ئالیێ دی چالاكڤانێن ئه‌فغانی چه‌ندین دیمه‌ن و ڤیدیۆ ل تۆرێن جڤاكی به‌لاڤ كرینه كو تێدا دیار دبیت چه‌كدارێن تالیبانێ ب زۆرێ دچنه مالا وه‌لاتیێن شیعه و داخواز ژ وان دكه‌ن كو هه‌تا سێ رۆژێن دی مالا خوه چۆل بكه‌ن، ئالۆزی د ناڤبه‌را وه‌لاتیان و چه‌كدارێن تالیبانێ دا دروست بووینه و چه‌ندین وه‌لاتیێن شیعه د ماوه‌یێ چه‌ند رۆژێن بۆری دا ب ده‌ستێ چه‌كدارێن تالیبانێ هاتینه كوشتن.
ل ئالیێ دی رێكخراوا مافێن مرۆڤی یا سه‌ر ب نه‌ته‌وێن ئێكگرتی حه‌فتیا بۆری راگه‌هاند كو ره‌وشا ژیانا وه‌لاتیێن ئه‌فغانستانێ گه‌له‌ك خرابه و رێژه‌كا زۆر یا خه‌لكی ژ تالیبانێ دترسن و دخوازن ژ وه‌لاتێ خوه بره‌ڤن، ژ به‌ر سیسته‌مێ نها ل ئه‌فغانستانێ بارێ ئابووری یێ خه‌لكی ژی گه‌له‌ك خرابه و رێژا بێكاری و هه‌ژاریێ گه‌له‌ك زێده بوویه، ژ به‌ر هندێ ژی هه‌كه تالیبان پێداچوونێ د هه‌لوه‌ست و سیاسه‌تا خوه دا نه‌كه‌ت و ل سه‌ر سیاسه‌تا خوه یا نها به‌رده‌وام بیت دێ ئه‌فغانستان تووشی كاره‌ساته‌كا مه‌زن بیت.
