تالیبان ل كوردستانێ و داعش ل ئه‌فغانستان
وارهێل محییه‌دین دوسكی
دویر نه‌بینه ئه‌وێن هه‌ر رۆژ محه‌مه‌د مه‌هدیان رادگه‌هینن و ئه‌ستورا ده‌جالی و زنجیرقه‌تاندنێ دكه‌نه فۆبیا بۆ خه‌لكێ مه‌یێ نشتیمانپه‌روه‌ر و خودێ نیاس دێ ده‌هۆلێ بۆ تالیبان ژی قوتن.
كه‌نگی تالیبان د رێڤه‌برنا ئه‌فغانستانێ دا یا سه‌ركه‌فتی بوو به‌ری بیست سالان؟ بۆچی تالیبان ب ئۆكه‌یا ئه‌مریكا هاته لڤاندن؟ بۆچی خه‌لكێ سڤیل خوه ب تائیره‌یێن فرۆكه‌یانڤه دانه كوشتن؟ و هزار و ئێك بۆچیێن دی بتنێ به‌رسڤا وان ئێكه…
ئه‌و ژی ژبه‌ركو جیهانگێری نه‌شێت خوه ل هه‌مبه‌ر هێزێن شه‌رانگیز و خودان ئایدولوژیێن دینی و سنۆردار ببینیت، ئێدی ئه‌و ده‌م ب سه‌رڤه‌چوو كه‌سێن نه‌زان و د شه‌كه‌فتان ڤه ژیاین بهێن سه‌ركردایه‌تیا خودان باوه‌رنامه‌یێن زانستی و ئه‌كادیمی و چه‌رخێ ته‌كنۆلۆچیا بكه‌ن… داكو گه‌له‌ك درێژنه‌بیت. ب كورتی نموونا داعش ل ئیراقێ و سووریێ هه‌مان سیناریۆیا تالیبانه ل ئه‌فغانستانێ، كا چاوا داعش وه‌ك رێكخراوه‌كا ئیسلامی هاته ناساندن و ل پشدا بۆ ده‌وله‌ته‌كا ئیسلامی یا ب گرێبه‌ست و ب هه‌می هۆڤایه‌تیا خوه هه‌ولدا ناڤوده‌نگێ ئیسلامێ نه‌شرین بكه‌ت و وه‌ك ئاینه‌كێ شه‌رانگیز نیشا خه‌لكێ نه موسلمان بده‌ت ب هه‌مان شێوه ئه‌مریكا تالیبان ژ شكه‌فتێن ئه‌فغانستانێ ده‌رئێخست و سیمایێ وان یێ كه‌ڤن و تۆزكه‌ویى وه‌ك هێزه‌كا ئیسلامی دانا سه‌ر قالبه‌كێ جیهانگێری و سه‌ربازیێ و سه‌رده‌م و دوباره نیشا خه‌لكی دا كو رێكخراوێن ئیسلامی چه‌ند ژ جیهانگێریێ ناهێن..
به‌لگه‌ژی د رۆن و ئاشكرانه ره‌فتارێن چه‌كدار و به‌رپرسێن تالیبان د پارچه ڤیدیۆیێن سۆشیال میدیایێ دا مه هه‌میان ب چاڤ دیتن..
لێ یا سه‌یر ئه‌وه ئه‌وێن ئه‌ڤرۆ ل كوردستانێ سیناریۆیێن سه‌رهلدانا ره‌وته‌كا ئیسلامی دكه‌نه بابه‌تێن خوه‌یێن گه‌رم و كوردستانێ ب ئه‌فغانستانێ به‌راورد دكه‌ن، هه‌مان ئه‌و سه‌روچاڤن ئه‌وێن ل ده‌ستپێكا سه‌رهلدانا تیرۆرستێن داعش، ب ئۆمێدا ده‌وله‌ته‌كا ئیسلامی و سه‌رده‌م و خودان شارستانیه‌ت ل قه‌له‌مددا و كێرفێ خوه بلندكربوو د ئاماده‌باشیێ دا بوون بۆ ده‌لیڤه‌كا زێرین، لێ ئه‌نجام بۆ هه‌میان د دیاربوون و ده‌ما داعش نه‌مایی ژنوی و یێ هه‌ولدده‌ن پاشگرێ ئیسلامی ژ پارت و رێكخراوێن خوه لاده‌ن … پرسا دهۆلقوتێن تالیبان ل كوردستانێ وه‌كی وێ گۆتنا كوردیه ده‌مێ دبێژن (( ئه‌ز بخوه چنه، عه‌لیكێ برایێ من))
